aate aate yuhin dam bhar ko ruki hogi bahar
jaate jaate yuhin pal bhar ko khizan tehri hai

yahee na hogaa ke dar-dar ki khaak chhaanengey
aur ai dil-e-khaana kharaab kyaa hoga

jo ohdadaar-e-junoon hain unhen khitaab milen
men baadshaah hoon meraa khitaab kyaa hogaa

zamaaney men ai 'raaz' ye yaad rakhnaa
na kehnaa kabhi raaz apnaa kisee sey

ye ehl-e-khirad kyaa samjhengey, ye ehl-e-nazar kyaa jaanengey
ai 'raaz' hamaaraa raaz hai kyaa, poochho ye kisee deevaaney se

wo leke gayaa jab mausam-e-gul, bulbul ne chaman ko chhor diya
poochha jo kisee ne ehqar dil, kyoon tarz-e-sukhan ko chhor diya

aate hain ajab andaaz se wo, mehfil men chhupaaye chehrey ko
zulfen jo hatin ik shor hua, sooraj ne gehen ko chhor diya

chaunke na kabhi bhi khwaab se ham, ghaflat men guzaari saari umar
ai waah ye ghazab kab aankhen khulin jab rooh ne tan ko chhor diya

ham na nikhat hain na gul hain jo mehektey jaaven
bas aag ki tarah jidhar jaaven dehektey jaaven

jo bhi aave hai nazdeek hi baithey hai terey
ham kahaan tak terey pehloo se saraktey jaaven

faanoos-e-khudee men aap mastoor hain ham
pardaa ye uthe to noor hi noor hain ham

dekhaa to sahi toone magar kyaa dekha
jitne nazdeek utne hi door hain ham

na raahbar hoon kisi ka na hamsafar hoon main
zamaane bhar se judaa apni raah par hoon main

tum apne dil ki zameen par mujhe bikharne do
jo laut kar kabhi na aaye wo sahar hoon main

kitaab-e-dil men basad ehtiyaat likh lena
fizool she'r naheen, harf-e-mo'tabar hoon main

yaad bhoole hue kuchh khwaab-e-pareshaan karlen
aaj jaati hui duniyaa ko bhi mehmaan karlen

marne waalaa to hua dafn tamannaaon ke saath
aap zulfon ko sanwaaren ke pareshaan karlen

ye khabar sun ke to dushman bhi chale aaengey
marne waale pe zaraa aap bhi ehsaan karlen