Salaysay ni Andy Barroga
Rugrugi
pay laeng ti Annak ti Pari-ir Sarrat Association (APSA) no ar-arigen, awan pay
pormal a panagsapata dagiti opisyales, ngem addan inleppasna a proyekto a
pakairanudan dagiti agbasbasa ken mangisursuro iti Pari-ir Elementary School
(Ruiz Elementary School itan)-- ti pannakaaramid ti water system iti pagadalan.
"Saanen
a kas idi." Impannakkel ni Ponceano Balicao (Ponce ti pangawag dagiti
nasisinged kenkuana), agdama a presidente ti organisasion. "Saanen a kas
idi a nasken a mangitugot dagiti agbasbasa iti sagsasangagalonda a danum tapno
adda pagsibogda kadagiti mula ken muyong, iti kasilya, pagdalus, wenno
pagbuggo." Kinunana.
Agarup
sangagasut a ribu a pisos ti nagasto ti APSA iti daytoy a proyekto ta
napaaramidan iti gripo ti tunggal kuarto ti eskuelaan. Turod ngamin ti disso a
nagsaadan ti eskuelaan ket pangadaywen ti bubon a pangnutnotan ti water pump iti
danum a maipundo iti tangke a naaramid iti uneg ti eskuelaan.
Nupay
kasta, kuna ni Ponce a pangrugianda laeng daytoy. No agtultuloy ti anep ken
simbeng dagiti kamen, adu pay ti panggepda nga itulong iti eskuelaan. Kas iti
pannakalinong ti entablado ti auditorium, wenno ti pannakapabaro ti
agrekrekkangen a basketball ken volleyball court. Adda pay planoda a
mangipatakder iti library.
Ngem
saan laeng a ti Pari-ir Elementary School ti plano ti APSA a tulongan no di ket
mangplanplanoda met iti pakairanudan dagiti amin a bumario. Panggep ti
organisasion ti mangipatakder ti waiting shed iti kada bario a sakup ti Pariir
tapno adda paglinongan ken pagtutugawan dagiti agsada iti lugan. Adda pay
planoda a tumulong kadagiti kalugaranda nga agpasina nga agnanaed idiay Pari-ir.
Saan laeng a dagiti kakabagian dagiti miembros iti matulongan no di ket basta
bumario iti Pari-ir. Madama a pagtitinongan dagiti opisyales ken miembros no
ania ti mabalinda nga itulong maipapan iti daytoy a banag.
Kadakuada
ditoy Hawaii, agkurkurren daytoy a paglinteganda. No adda man matay a miembro,
wenno asideg a kabagian ti miembro, agkokontribusionda iti saglilima a doliar
tapno adda ilimos ti organisasion kadagiti agpasina.
Adu
pay ti naagapad ni Ponce a plano ti gunglo iti masakbayan ngem kasano a
matungpalda dagitoy ket mabilbilang laeng dagiti miembro? Addaanda pay amin iti
fulltime job ket saan laeng a ti organisasion ti inda tamtamingen?
"Uray
bassit ti bilang dagiti miembros no mannakitulongda amin." Inkalintegan ni
Ponce. "No adda fundraising, siaabuloyda amin a tumulong. Isu nga awan
makitak a lapped tapno di matungpal ti gunglo dagiti panggepna iti
masakbayan"
Kabayatan
ti pannakasursurat daytoy a salaysay, madama manen ti panag-fundraising ti
gunglo iti huli-huli chicken para iti sumaruno a proyektoda-- ti pannakalinong
iti entablado ti auditorium iti eskuelaan. Ket no adda naan-anay a pundo,
mapasemento pay dagiti tugtugaw iti lawlaw ti auditorium.
Saan
laeng nga aglako ti huli-huli ti panguartaan ti gunglo no di ket agpartida pay
iti baka wenno baboy nga ilakoda. Ditoy met a makita ti kinaalibtak da Walter
Sarandi, Willie Agnir, Angel T. Foronda, Eustaquio Balino, Rogelio Agarpao, Juanito Agnir, Juanito
Ramos ken ni Guillermo Agnir a pumarti. Uray no agpatpatnagda no dadduma, saanda
agsapsapul iti tangdanda. Adda la ket sangkabassit a pangibulonda iti
tumtomarenda, naganaygayda a mabigatan.
Ngem
apay a napanunot dagiti taga-Pari-ir ti nangbuangay iti kabukbukodanda nga
organisasion imbes a kimmapponda koma kadagiti daddadakkel nga organisasion
dagiti taga-Sarrat ditoy Hawaii?
"Dimi
kabukbukodan ti panagdesision sadiay." Insungbat ni Ponce. "Dayta ti
gapuna no apay a nabuangay ti Annak ti Pari-ir Sarrat Association-- tapno
maipamaysami a tulongan ti Pari-ir."
Nabayagen
nga arapaap ni Ponce ti mangbuangay iti kabukbukodanda nga organisasion ngem
amkenna a makibur laeng dagiti dua a dadakkel nga organisasion dagiti
taga-Sarrat iti Hawaii a nakikamengan dagiti dadduma a taga Pari-ir. Adda ngamin
singasing idi a mapagkaykaysa dagiti organisasion ti Sarrat ditoy Hawii.
Malaksid iti dayta, adu met ti pakakumikomanna iti trabahona idi a kas kameng
iti U.S. Navy.
Ngem
idi simmangpet ti maysa a kalugaranda ditoy Hawaii, ni pasado kapitan del bario
Cenon Abanilla, idi naikkan ti Welcome Party, insingasing ti maysa a
kalugaranda, ni Mrs. Felomina Balino, nga adda koma mabuangay nga organisasion
dagiti taga-Pari-ir tapno makatulongda met idiay lugar a naggapuanda.
Immanamong
dagiti kaaduan iti daydi a singasing ket dayta metten ti nakagutadan ti rikna ni
Ponce a mangirugi ti nabayagen nga inar-arapaapna. Pagpiaanna, umadani idin ti
panagretirona iti serbisio.
Kalpasan
daydi a taripnong, rinugian ni Ponce ti nagipatulod iti surat (survey letter)
kadagiti dadduma a kalugaranda tapno inna tingitingen ti kapampanunotanda
maipapan iti daytoy a banag.
Idi
Oktubre 1997, iti Sand Island Park, naaramid ti umuna a panagmimiting.
Aglimapulo dagiti timmabuno. Iti daydi met la a gundaway, naaramid ti umuna nga
eleksion dagiti umuna nga opisyales ti kabuangbuangay a gunglo-- ti Annak ti
Pari-ir Sarrat Association.
Ngem
saanda nga impanpannakkel a kinabaelanda ti nangbuangay ti kabukbukodanda nga
organisasion. Saanda a nagup-upa iti hotel wenno restaurant tapno sadiay ti
pakaangayan ti induction dagiti opisyales. Saanda a nangsangsangaili kadagiti
nangangato nga opisyal tapno mayam-ammo ti organisasionda iti komunidad ni
Filipino.
"Dimi
pakaringgoran dagita." Kinuna ni Mrs. Paulina Sarandi, agdama a tesorera ti
Gunglo. Nasuroken a duapulo a tawenna ditoy Hawaii ngem dina kano maiwaksi ti
kinapateg ti nakayanakanna a lugar. "Di'uray man pay ket am-ammo amin a tao
ti organisasionmo no awan met makita a gapuananna." Kinunana, sana intuloy,
"Aramid ti pakakitaan!"
Dagiti
agdama nga opisyales: Ponciano R. Balicao, president; Eluminado E. Balino,
vice-president; Eva P. Dadiz, secretary; Lita Tagaca, assistant secretary;
Paulina A. Sarandi, treasurer; Norma L. James, assistant treasurer; Ermelita
Roter, auditor. Business Managers: Rogelio B. Agarpao, Walter Sarandi, Eustaquio
Balino, Juanito Ramos ken William Agnir. Dagiti Advisers: Benita V. Tagalicud,
Angel T. Foronda, Francisco D. James, Cenon Abanilla, ken Maximo Pacba.
"Sigurado
la ketdi a dakkel a pammadayaw ti isagsagana ti eskuelaan para kadakayo inton
agawidkayo Apo presidente," kinunami.
"Agawidkaminto
ngem dimi sapsapulen ti pammadayaw." Kinunana ketdi. "Umanayen a
liwliwami a makakita kadagiti ubbing a ti libroda laengen iti awitda nga
agturong iti eskuela."