史諾比與查理舊事記 (2)
16th April, 1999 to 5th August, 1999
1999年4月16日
今日雖然成日坐o係部電腦前面, 但係我有做o野o架, send o左兩封信, 準備打多幾封, 要積極D至得. 擒晚成晚都訓得唔好. 今日要訓多D至得, 尤其係星期日晚, 一定要訓多D, 如果唔係會唔靚, 哈哈......舊o既日記太多, 所以要搬去舊事記Part 1, 大家miss o左可以去睇睇啦!
1999年4月17日
今日又係打信, 有D悶, 仍然唔想溫書, 睇怕今晚去完街番o黎都溫唔成. 點算呀, 考試就快到啦, 但係書就溫得少少, 真係考天才咩?! 擔心搵唔到o野做. 擔心考試唔好. 擔心屋企人......擔心好多o野, 好唔開心. 好煩......= ( ......哈哈, 今晚睇番F. 2果陣同Cat姐影果D相, 真係笑到停唔到, 加(注意: ), 成棵咁, 正到嘔, 我自問就唔夠佢in啦, 細細個著衫就咁有taste, 哈哈哈哈 = P
1999年4月18日
今朝同班小學同學同埋俞老師去飲茶, 大家都係傾番o下近來o既情況, 唔經唔覺都成十年, 坐o下坐o下又坐o左兩個幾鐘, 跟住大家就解散, 不過都好o架啦, 都有成十一個人到, 算係咁啦, 大家覺得開心咪得囉!
1999年4月19日
原來變個新形象都幾麻煩, 攪o左成個幾鐘先至掂, 不過要靚就唔要命, 冇計啦!
覺得靚
o左咪得囉! 嘻嘻 = )
1999年4月20日
今日係轉新形象番學o既第一日, 有預期o既反應, 亦有意外o既反應. 預期會比D同學問,
但係無o諗過竟然有熟人唔認得我, 係咪真係同以前差咁遠呀?
1999年4月21日
無心向學, 可以點醫呢? 對住本書, 完全唔想溫, 真係好擔心考試過唔到 = (......睇番擒日同至愛Shannon o係冒險樂園影果張貼紙相, 見到自己個新形象真係有D唔慣......不過講開擒日碌ling真係有D唔抵, 一次全中都無, 呃錢!!
1999年4月22日
收到一月做果條term essay, 出奇地高分(因為做果排一D都唔集中精神), 可能係tutor手下留情, 又或者係最低分係我o掛, 點都好啦, 呢個係意外驚喜, 都幾開心......聽日就係老豆同媽咪結婚"N"(唔記得係三十幾周年)周年紀念日, 真係好開心呀! 其實我都想好似佢o地咁, 快D搵到一個好好o既人結婚, 過"N"咁多次結婚紀念日就好啦! = P
1999年4月23日
真乖女, 唔讚自己都唔得, 請老豆同媽咪飲茶, 哈哈, 雖然唔貴, 但係都好乖啦......溫書係我每日生活o既一部份, 好悶......今日形象又再變, 好爽呀! 唔知聽日補習個細路會唔會唔認得我呢?
1999年4月24日
就快比補習個細路激到嘔電, 懶到死, 死蛇爛鱔咁, 賺佢少少就激到電都嘔埋, 唉...... = (
1999年4月25日
唔經唔覺已經浮沉o左o係ICQ成年有多啦, 好想唔再玩, 但係心思思又玩番, 真無用....= (
1999年4月26日
唉, 真係多得果隻死人CIH唔少, 攪到我部電腦down o左, 幾乎與世隔絕......今日Rosan打比我呀, 原來佢已經番o左o黎幾日, 不過最衰要考試啦, 如果唔係真係好想見o下佢, 真係好耐無見過佢啦, 佢走果陣又無送佢機, 希望快D考完詆可以同佢一齊去玩o下啦!
1999年4月27日
慘啦, 部電腦仲未整好, 都唔知要等到幾時, 用o左boot機碟都唔掂, 自己又唔識整, 大鑊大鑊.
1999年4月28日
已經係與世隔絕第三日, 終於可以做留個好人, 修心養性好好溫書啦. 太多o野溫, 真係想死. 無電腦o既日子真係好悶, 仲要(其實係希望)等到下個禮拜先有人整, 淒涼, 如果邊個好心人識整電腦, 又睇到呢段日記o既話, 麻煩打個電話比我, 教o下我點整, 又或者好人D幫我整好佢啦! (應該format過個harddisk就掂o架啦, 可惜我連機都開唔到, 唉!) 有辦法o既話請大家醫貓或者打電話比我啦! Thank you very much! = )
1999年4月29日
而家o係C.C.浮沉緊, 鬼唔死咩, 仲未整番好部電腦, 唯有番o黎check牙果陣順手check埋貓. 覆 message. URL. upload埋diary啦, 嘩, 一開ICQ簡直嚇親, 成十幾個message同URL, 真係唔敢想像一個月唔開果陣會點, 唔該大家暫時唔好send message比我住啦, 如果唔係遲D一開機就遲早hang機......睇番個page counter, 發覺又多o左人o黎睇, 真係唔好意思啦, 部死人電腦壞o左, 攪到我無得update, 唯有等到今日先可以連埋幾日o既diary一齊打埋, 相信過o左呢幾日之後大家又要等好耐至見到我o既新diary lu. 不過都好o既, 修心養性溫書, 做留個好人囉. 大家若果仲有我心, 又或者仲掛住我o既話, 得閒就send封貓又或者打電話, 又或者留底o係guestbook比我啦! 嘗試儘快覆您o地啦 = )
1999年5月13日
部電腦壞o左成兩個幾禮拜, 都仲未有人得閑幫我整, 好唔掂. 而家o係C.C.無心機讀書, 所以update o下日記啦!o岩o岩過o左果個星期真係辛苦, 連續考足四日, 真係人都癲, 黑眼圈大到離奇, 晚晚成三. 四點至訓, 鬼唔死咩! 聽日晨早又要interview, 睇怕都就快死, 人o地見到我個眼圈咁黑都實唔請o架啦!
1999年5月15日
今日又考完科散文啦, 不過又挫敗多一次. 唔掂唔掂, 剩番兩科咋, 真係要好比心機至得啦, 如果唔係就死硬啦! ~_~
1999年5月20日
考完楊玉峰份paper, 真係有D失落感, 因為D問題實在太刁鑽啦, 完全唔大路, 真係一睇份卷就知道會衰果隻. 唔掂唔掂. 話咁快就考完試, 又要搵o野做, 真係好鬼死煩. 唔知點解, 近排真係好down, 可能就快畢業, 加埋又就快失業啦. 憂憂憂!!!
1999年5月21日
今日去洗牙, 聽到D鑽落牙o既聲, 認真得人驚......就快農曆生日, 有D失落感, 因為過o左咁多年生日都係自己一個人, 好想快D搵番個伴, 不過話咁易咩!? 兩張有多啦, 真係擔心......唉, 都係等遲D考好個試, 搵到o野做至算啦......灰心......~_~
1999年5月27日
終於放監啦, 哈哈哈. 讀o左十九年書, 終於可以暫時抖抖, 不過都唔知要抖幾耐至搵到
o野做. 點都好啦, 小休幾日又要再作戰搵o野做啦. 陰功!......聽日就生日啦,
又老一年, 擔心縐皮, 又擔心失業, 不過最希望開開心心啦! =)
1999年5月28日
今日又老一年啦, 不過老o左都開心o既, 因為呢個係我o既一個新開始嘛! 希望呢一個係一個好開始,
唔會再唔開心, 身體健健康康, 屋企人個個做事都順順利利. 又希望快D搵到o野做啦,
好似貪心o左少少o添!......點都好啦, 今年真開心啦, 考完試, 大家都記得我
o既生日, 又陪我慶祝, 好開心呀! 擒晚好開心呀, Morning到十二點打比我同我講生日快樂,
仲扮琦琦o既"XKII"廣告 o添, 呢個"午夜凶玲"真攪鬼.....講開午夜凶鈴, o車,
都唔驚
o既, 等我開頭仲預o左驚到拗斷把遮o添, 點知原來又悶又無料到, 唔掂唔掂......係呀,
順手o係度祝埋同我同年同月同日生日o既蕉姐. Vic. 逸風同Dave生日快樂, 青春常駐啦!
= )
1999年6月2日
隔o左成個禮拜又番HKU啦, 又有得update o下個homepage啦, 其實真係有好多o野想寫, 不過都唔知由邊度講起好......今年生日過得好開心呀, 一來無o左考試o既壓力啦, 二來又有好多人同我慶祝, 真係估唔到咁多人記得我生日喎! 嘻嘻! 特別係今日收到細馮封貓呀! 好開心呀! 咁多年生日細馮都會記得, 認真有心......o諗o下先, 今年有Judith姐. 阿謝. Susanna. 阿Cat. Dilys. Carol 同Brenda同我過生日, 仲有收到一D生日咭o添. 雖然好多人都好有心, 但係無心o既人仍然有好多, 既無電話, 又無搵我食飯, 就連e-mail都無個, 認真無誠意! = ( 不過點都好啦, 今年生日真係過得好開心, 希望年年生日都過得咁開心就好啦! = )
1999年6月5日
今日終於整番好部電腦啦, o諗o諗o下, 今日真係好鬼死唔好意思, 又一次覺得自己唔成熟......近排好多時間都去o左街,
真真正正留o係屋企o既時間真係唔多, 希望聽日可以早D起身同媽咪老豆飲茶啦......唉,
又一難題考起我啦, 做聯絡人一D都唔好玩......唔知點解, o係ICQ復活之後突然有小小失落感,
所有o野要重新開始, D人o既info改到亂晒籠, 所有
o野都變晒lu! ~_~
1999年6月6日
今日同個friend講開佢o既愛情問題, 都幾難答, 自問愛情經驗係一片空白, 好似無咩資格去教人點做, 不過有一樣o野我可以好肯定咁講, 就係愛情同自由唔係相輔相成o既, 有愛情唔代表一定要脫離晒身邊所有o既朋友, 每個人都有自己o既生活家嘛, 係咪? 要逼自己變. 勉強遷就其他人, 似乎會令自己受苦, 變o左就無o左真我啦; 但係反轉o諗, 如果鍾意一個人, 但係唔肯為佢而變, 又似乎愛得唔夠投入......人真係矛盾......
1999年6月7日
今日都冇咩特別o野發生, 本來想去寄信, 郵局未開, 去圖書館, 又未開, 八號風球對於我o黎講好似冇咩好處, 仲好似有D壞處o添! 去補習果陣落鬼咁大雨, 整到褲腳濕晒不特止, 個靚仔又唔聽話, 激死人! = (
1999年6月8日
起身. 食飯. 打信. 睇書. 補習. 番屋企. 訓覺, 呢個禮拜o既生活同上個禮拜真係差得遠, 上個禮拜真係無停過, 今個禮拜真係平靜好多好多, 同考試果排更加係天淵之別, 好似由地獄番到天堂咁, 由早排晚晚訓幾個鐘到而家晚晚訓十幾個鐘, 個人突然肥番幾磅, 有D enjoy咁o既生活, 但係又知道唔可以長遠係咁失業, 真係好矛盾......好耐未見過Zenia啦, 有D掛住佢o添.....係呀, 本來聽日約o左Rosan o架, 但係佢病o左呀, 希望Rosan快D好番, 等我可以見o下佢, 同佢食餐飯, 唱o下K, 之後送佢機番加拿大啦!
1999年6月9日
放o左兩個禮拜假已經覺得有D悶 ......收到細馮o既貓, 估唔到佢咁快回信......補習個靚仔仍然係死蛇爛鱔,
真係吹佢唔脹, 但係奈何已經比錢蒙蔽o左咁耐, 都冇咩辦法~_~......唔知點解,
近排好多人話比我聽佢o地唔開心, 老實講, 我安慰人真係唔多掂, 早排自己唔開心都係叫自己睇開D.
唔好鑽牛角尖, 分散D注意力做其他o野就算, 樂觀係我自己解決問題o既唯一辦法,
希望大家可以試試啦! = )
1999年6月10日
補習個靚仔終於有番少少心機啦, 都有番少少安慰.....今日收到三個消息, 兩個好o既, 一個壞o既, 希望以後每日聽到o既都係好消息就好啦!
1999年6月11日
補習個靚仔有少少進步, 都有D老懷安慰, 有心機打多D題目比佢做, 希望臨尾進補都唔太遲啦......今日同一個朋友傾計, 發覺佢而家o既態到比以前冷淡o左好多好多lu! 時間耐o左, 人都會變晒, 都唔知係咪自己無變過, 定係無進步過......聽日去梅窩camp啦, 唔知點解, 好似番o左小學階段咁, 有小小興奮, 有小小訓唔著o添! = P 去兩日camp, 又要暫別大家兩日lu, 兩日後再o黎睇睇我o既日記啦!
1999年6月13日
終於去完camp番屋企啦, 番到屋企, 第一件事最想做唔係沖涼, 而係想好好o地咁訓番一覺.
嘩, 擒晚真係訓得辛苦到不得了, 基本上係無覺好訓, 七個女仔, 逼埋o係一張碌架床,
逼成點大家可以想像得到......不過, 今次去camp好好玩, 成班老表玩埋一齊, 好耐都未試過啦!
仲有呀, 今日仲去o左天壇大佛o添呀, 大佛開o左咁耐, 我先至第一次去, 真係out
o左小小, 上大佛條樓梯睇落好長, 但係一D都唔辛苦, 上到大佛, 一陣陣清涼o既山風吹埋o黎,
都咪話唔正, 行咁多級樓梯上去都抵番晒......不過車程就長D, 架車又"凳"到飛起,
來回兩轉拋上車頂再跌番落o黎廿幾次咁滯, 來回搭成兩個鐘無冷氣o既所謂冷氣車,
食
o左一碗好正好滑o既山水豆腐花, 呢個"大嶼山天壇大佛山水豆腐花半天團"(個名作得有咁長得咁長)都算係咁啦!
1999年6月14日
今日去o左樂富啦, 又寄o左三個希望啦, 又同三個傻婆去食飯. 影貼紙相啦. 之後又再食糖水, 完全係一個"夜全食"團, 真係幾開心o架......不過唔知點解, 近排每次玩得好開心之後, 個人唔多唔少都會有D失落感, 嘗試用好多辦法去令自己無呢種失落感, 但係每一次越玩得開心之後, 失落感就更加大, 有時真係覺得自己咁樣好無謂......誠徵醫治"狂歡過後失落症"良方......
1999年6月15日
近排身體認真差, 去完camp番o黎就病, 都唔知做咩鬼o野, 平時自問身體幾好, 好少病, 呢兩日就喉嚨痛到死, 又咳到死, 真係好辛苦......今日終於補完習啦, 正正式式失業, 都唔知要到幾時先有o野做......擒晚講開, 原來仲有兩個禮拜就放hon啦, 真係有小小緊張o添, 不過驚考得唔好, 都係半夜潛番HKU睇result好D啦! = P
1999年6月16日
今日一早就起o左身啦, 認真難得......咳仍然未好, 睇o左獸醫, 食o左"吉蒂陳"開o既藥, 好似唔多掂, 依然係咳. 依然係喉嚨痛, 咳到死, 真係好辛苦, 最怕病, 又要食藥, 不過最需要o既係人o既關心......今日屋企做節, 打邊爐, 好驚聽日開唔到聲, 不過D海鮮真係好正, 冒住出唔到聲o既危險都要食......嘻嘻 = P
1999年6月17日
今日晨早起身攪interview o既o野, 又要洗頭. 又要吹頭. 又要妝身, 整o左成粒鐘, in一次都幾煩 ......鬼叫自己生得細路咩, 就算著o左套suit都唔老餅得去邊......去到觀塘in, 等o左半粒鐘, in o左三個字, 睇怕都無咩機會second in......終於影o左數碼相啦, o諗番起Dilys個緊張樣, 真係笑到碌地......D咳依然未好番, "吉蒂陳"唔多掂......
1999年6月18日
D咳未好, 出街果陣個人都無咩心機, 考試果陣讀到死o下死o下又唔見有事, 反而考完試得閑就病, 個人就唔妥, 真係生成一條辛苦命......有書讀果陣又話辛苦, 到而家讀完啦, 又話量地又話悶, 認真唔掂......
1999年6月19日
仲未好番, 都無咩心機出街, 成日都留o係屋企, 借o左書睇啦, 食藥訓覺, 咁就過o左一日 ......今日同o左兩個好朋友傾o左好耐, 好耐都未試過啦......發覺仲有好多o野未做......唔掂......
1999年6月20日
今日係父親節, 雖然病未好, 但係難得老豆今日放假, 早D起身同佢飲茶都無計啦......又打o左幾封信lu, 唔知有無希望呢?......夜晚同o左三個老豆慶祝父親節, 一個係老豆啦, 一個係阿爺啦, 另一個係姨丈啦, 雖然人好多, 但係食飯果陣熱熱鬧鬧咁, 好鬼溫馨o架, 加埋睇番"大嶼山天壇大佛山水豆腐花半天團"o既相, 簡直笑到碌地! = )
1999年6月21日
足足病o左一個禮拜, 都仍然未好, 真係擔心係肺癆......今日做o左D咩呢......去o左樂富啦,去o左買電腦書啦, 去o左買衫啦, 嘻嘻, 係咁多啦......係呀, 今日Carol去o左澳洲啦, 祝佢一路順風啦! = )
1999年6月22日
買o左果本電腦書終於開始睇, 開始學, 要重新做人, 唔好再咁頹廢至得啦, 加埋有人幫我"遙距學習", 自然會好好多啦!
1999年6月23日
今日一早媽咪就打電話番屋企, 攪到無覺好訓......睇番自己張搵工相, 笑得鬼死咁生硬, 又老餅, 唔掂唔掂......
1999年6月24日
好遲先起身, 等到媽咪番o黎同佢去o左飲下午茶. 飲完茶番到屋企, 攪多兩攪,
執o下屋企o既o野, 就已經成五點, 日日o既生活都係咁, 越來越覺得自己頹廢. 好在今日都睇o左兩本書,
keep住睇書先可以令自己無咁無聊, 又學多小小o野啦......收到細馮o既貓, 睇過佢
o既homepage, 先知原來自己個homepage無咩料到, 認真要加料至得, 睇o下遲D書上面
o既o野用唔用得著啦! 不過每個人o既homepage都有自己o既風格o既, 我都係鍾意o係自己個homepage講o下自己o既o野多D,
因為我實在太鍾意講o野啦, 平時無時間. 無機會. 又或者無人聽o既o野, 全部可以打晒落個homepage,
可能會有人睇, 亦都可能會無, 總之又多一個講o野o既途徑, o岩晒我! = )
1999年6月25日
今朝個個都打電話叫我起身interview, 有D感動......到正式in果陣, 成七個人一組, 個個都係大學生, 機會已經等如零, 就當係吸收一次去大公司in o既機會啦!
1999年6月26日
熱到死, 邊度都唔想去, 又驚有virus, 成日都唔敢開機, 怕o左再中招......睇書睇o左一日, 雖然係識多o左o野, 但係都有D悶......
1999年6月27日
太熱啦, 又比多個籍口比自己留o係屋企......今日係阿Cat家姐結婚, 祝佢新婚愉快啦! = )
1999年6月28日
今日一早就起o左身, check完貓就出o左門口啦, 點知Brenda同Dilys又要遲o黎......今日做o左D咩呢? 唱o左K啦(好耐未唱過lu). 番o左HKU啦, 之後又做o左好多濕碎得o黎緊要o既o野啦, 都過得尚算充實.
1999年6月29日
今日又係一早起身, 做o左咩呢? 打o左信啦. 聽talk啦. 仲有好多o野未做......聽日就放hon啦, 真係好擔心, 好後悔當初唔比心機讀書, 但係都Year 3啦, 後悔又有咩用? 唯有求神拜佛希望自己唔考得太差啦, 不過都難D啦......~_~
1999年6月30日
今日放hon, 開頭番HKU果陣一D都唔驚, 但係當放hon時間到, 一路o係樓梯行上去果陣,
隻腳開始軟, 咁大個女都未試過緊張成咁......一睇result, 好彩唔係最差果批,
當然又唔係最好果班啦, 興幸自己符符碌碌考得唔差, 嘻嘻= ).....o諗番考試果陣,
果陣心情唔多好, 加埋又無咩心機讀書, 考到幾好o既成績, 真係好好彩......仲有個同學考到First
Hon o添呀! 真係開心! = ) 自己班同學考得唔錯, 整體o黎講都幾好啦, 好開心呀!
係呀, 早排去旺角果陣早到一隻大o既畢業米奇, 大家識做啦, 嘻嘻......= P
1999年7月1日
今日回歸, 對於我o黎講都無咩特別, 因為日日都係假期......磨o係屋企一日, 完全唔想出去, 好頹......
1999年7月2日
開始積極番少少 , 有打信, 又去圖書館借書, 算係咁啦......
1999年7月4日
今日去o左黃金, 人又多, 逼到死, 下之都唔駛指意我下一之星期日再去......
1999年7月5日
今日約o左四個o傻婆同阿謝慶祝生日, 五個傻婆用o左狂風掃落葉o既速度食晒五碟o野, 犀利..
1999年7月6日
嘩, 好驚呀, 今日居然o係地鐵度見到黃夏蕙呀,
認真邪......佢上鏡o既嚇人程度係100%, 而真人o既嚇人程度係200%呀! 化個成尺厚o既妝,
條眼線成cm粗, 仲要扮晒o野, 大大聲
o係地鐵度講電話, 戴副超勁老土o既黑超, 真係嚇死, 仲邪過見到貞子呀! 今晚一定發惡夢......
1999年7月7日
今日有個老友o係日本番o黎, 好耐無見啦, 見番佢, 有D生疏o既感覺. 唉, 佢留半年又會再走, 同D屋企人. 男朋友分開三四度地方, 遲D仲話去美國, 比我就一定唔會啦, 好似一D家庭溫暖都無咁, 除非公幹又或者好鍾意自己o既另一半啦!...... 呢兩日都收到D唔好o既消息, 希望聽日會好啦!
1999年7月8日
今日本來約o左Lilian食飯, 點知落到鬼死咁大雨, 結果都係要cancel, 成日留o係屋企,
好悶呀! ......聽日就知道自己o既grade啦, 雖然已經知道hon, 考得OK, 但係都有少少緊張
o添, 嘻嘻! = )
1999年7月9日
今日番o左學校, 終於知道成績啦, 竟然比上一年好o左咁多喎! 真係有D意外o添! 真係多得考試果陣部電腦壞o左唔少至真, 若果唔係, 相信冇考得咁好啦! = P
1999年7月10日
七月已經差唔多過o左成半啦, 但係我仍然未搵到o野o做, 成日"柄"o係屋o企無所事事, 唉, 今日又寄o左三封信, 睇怕又係石沉大海啦! = (
1999年7月11日
今日聽到一個消息, 有個人寄o左百五封信, interview o左三十幾次, 有兩個offer, 聽日仲有interview, 真係眼紅......唉, 點解我咁黑仔, 成兩個禮拜都無interview o架!
1999年7月12日
今日講開, Alan問我有o野做未, 佢話大部份今年畢業o既兄弟都搵到o野做啦, 自己o諗番o下, 唯獨係我一個仲係咁霉, 都算係十兄弟裏面最唔掂o既一個, 唉! ~_~
1999年7月13日
今日至愛打比我, 原來師傅又唔o黎得, 唉, 都咪話我衰啦, 其實都預o左, 次次約晒其他九兄弟出o黎, 師傅就一次都未出現過, 今次都預o左, 算啦! ~_~
1999年7月14日
有時D o野真係唔到你唔信邪, 前日o諗住得閒D, 熨定D恤衫等interview果陣唔駛臨急臨忙要著縐衫啦, 嘩, 真係講都唔信, 熨o左D衫之後就有兩次interview, 以後洗完D衫一定要立即熨至得! = P
1999年7月15日
唉, 今日o既況態真差, 突然之間又in唔成, 原來大學生真係多到人o地隨時可以鍾意in你就in你, 唔in你就立即叫你番屋企, 唉, 認真無奈 ~_~......今日黑o既事實係太多, 約o左人又白等(雖然係一場言語上o既誤會), 又有人不斷叫你做D你唔鍾意做o既o野(雖然呢果人係出於好意), 攪到個人好躁, 當住好多人面大聲鬧人, 人o地覺得我好無禮貌, 我都無心, 但係真係好激氣. 忍唔住, 連餐飯都食得有D唔高興! = (
1999年7月16日
今日上. 下兩晝in兩場, 仲忙過D大明星, in得普普通通, 但係至橋o既係in我o既人係我o既師姐,
問埋我D o野大多同工作無關, 哈哈哈哈 = P......原來 熨定D恤衫等interview真係掂
o架, 今日又有人叫我聽日in啦, 大家不妨抄抄橋, 一來未雨籌謀, 唔駛臨急臨忙要著縐衫啦,
二來又可能有in o既機會, 掂唔掂就要睇你自己啦! = P
1999年7月17日
上晝去o左interview, 雖然有D興趣, 但係太多人爭啦, 人o地條件又好過我, 睇o黎second in o既機會都唔大lu, 希望快D有下一個interview啦!
1999年7月18日
成日都o係屋企, 無事可記.
1999年7月19日
今日又係留o係屋企, 打o左幾封信, 下晝仲有人叫我in o添呀! 算係咁啦!
1999年7月20日
今日又再次證明o左大學生越來越唔矜貴呢個事實, 有時in得多反而個人仲越冇信心......好彩今日有兩個細路陪我呢個老人家,
聽o下我講廢話, 先至覺得好少少咋! 聽日一定要發奮, 努力加油!
1999年7月21日
今日約o左Morning又遲咁多, 真係勁唔好意思, 唉, 遲到呢個壞習慣唔知點解改極都改唔到, 唔掂唔掂......哈哈, 好耐無唱K啦, 要多謝老闆比錢, 唱得特別開心, 哈哈, 不過最衰就係咁快要走......今晚許志安演唱會ok啦, 比想像中差少少o者......唔知點解, 近排一個人夜番屋企o既時候, 就自不然覺得一個人好寂寞, 好無安全感, 唉, 真係好想有個人可以陪我番屋企, 番到屋企仲要好緊張咁打電話比我, 仲可以再傾多兩個鐘電話都唔覺眼訓o既人 ......唉, 早o左少少發夢o添! = P
1999年7月22日
成日都留o係屋企, 街又唔落, 信又唔打, 好似自閉咁......但係o諗o諗o下, 我咁多o野講, 一D都似一個自閉o既人o者!
1999年7月23日
一早起身, 都無做過D咩, o係HKU浮o下浮o下又過一日, 不過都算積極, 打o左幾封信......
o係CC打信打到差唔多走果陣, 撞到Thomas, 佢係奶賢o既同學, 同佢都有幾面之緣,
但係佢個樣同佢個名實在太普通, 試過佢叫我, 但係我唔記得佢個名(以我記憶,
呢個咁尷尬
o既情況已經發生過兩次), 但係佢次次都會同我打招呼先, 所以覺得原來名校出身o既人都唔來都唔係個個都咁串o既.
= )
1999年7月24日
成日都好似訓唔夠咁, 鏟都唔願起身......又寄o左六大封信啦, 寄o下寄o下又差唔多寄o左成百封信, 等o左兩個月啦, 依然未搵到o野做, 有時真係好擔心唔知要搵到幾時先至有份工, 自己又無咩工作經驗......不過有時都要積極D o既, 永遠都死氣沉沉就一定唔掂, 更加唔可以等到...... "命運就算癲沛流離, 命運就算曲折離奇, 命運就算恐嚇著你做人沒趣味, 別流淚心酸, 更不應捨棄, 我願能一生永遠陪著你"......做人有時都要樂觀D o既! = )
1999年7月25日
突然間個人積極o左好多, 打o左成十封信, 希望有一封有回音啦!
1999年7月26日
擒晚鬼咁夜訓, 今朝又鬼咁早起身, 個人都無咩精神, 仲要上堂, D人又老餅, 又騎呢, 簡直係得啖笑, 哈哈哈!.....夜晚本來約o左Zenia食飯, 但係最終結果又係得四個傻婆, 每次又係有Carol無Zenia, 有Zenia無Carol果隻, 都唔知佢兩個前世係咪撈亂骨頭......四個傻婆繼續發神經, 竟然撞到Brenda個friend, 真橋......又發神經買o野......有個老友就快走啦, 無時間再約佢出o黎o添, 算啦, 大家都咁忙, 留番佢12月番o黎有手信再見啦, 嘻嘻! = P
1999年7月27日
今日又上騎呢班, 好悶, 又眼訓, 好在後尾玩人玩得幾高興, 哈哈哈!
1999年7月28日
今朝去o左interview, first in就見老闆, 相信最有誠意都算係呢間公司......有D唔舒服, 今日無番騎呢班, 又cancel o左唔出去食飯, 真大損失, 又無人玩, 又無飯食! = P......聽日老友就要走啦, 因為太早, 實在起唔到身去送機, o係呢度祝佢一路順風, 學業進步, 身體健康, 大吉大利, 總之就樣樣都咁掂啦! = )
1999年7月29日
唔經唔覺七月就快過完, 又有人同我講話搵到o野做啦, 唉, 自己仲係咁, 都唔知點算, 我都算積極啦, 但係點解仲未搵到o野做? 真係唔明......都唔知行咩衰運, 頭先一個唔為意, 踩o左落D玻璃碎度, 好在入肉唔深, 但係見到D血不斷咁流出o黎, 真係好驚, 又痛到死, 真係有痛到入心入肺o既感覺, 好在都止到血, 都算不幸中之大幸......老友已經飛o左去New York啦, 祝佢一路順風啦! = )
1999年7月30日
今日要教兩個uncle摺紙, 原來真係一件唔容易o既事, 嘻嘻! ......聽日仲要連踩三場,
過
o左聽日就一片光明, 快D過o左聽日就好啦! = P
1999年7月31日
上晝in兩場, 下晝又要幫手, 搭車果陣已經眼訓到嘔電......講開interview, 竟然見到熟人, 又見到一封First Hon o既人o既application letter, 簡直心都實埋, 搵工真難......~_~
1999年8月1日
今朝晨早就起o左身同媽咪老豆飲茶, 好耐都未試過咁乖. 咁早起身啦, 至少暑期以來先得果一兩次......之後成日都係留o係屋企訓,
認真頹廢......媽咪同老豆番大陸兩日, 呢兩日又要食自己, 唔掂唔掂......日日係度打日記,
有時真係好懷疑有無人會睇, 不過據我所知都有幾個忠實讀者o既, 嘻嘻 = P......不過佢o地好少對我o既日記有response
o既. 點都好啦, 呢個homepage幫我識o左幾個志同道合o既朋友, 希望未簽guestbook
o既老友潦番幾隻字, 比D comment我, 等我新o既homepage可以做得更加好......講開朋友,
今日師傅竟然打電話比我喎, 好開心呀! = ) 不過更加多朋友係失去聯絡o既, 希望佢o地可以得閒搵o下我啦......收音機而家播緊克勤隻這段愛,
呢隻歌好冷門o架, 但係我好鍾意......呢隻歌係
"雨中街頭劇"其中一首正歌, 大家不妨聽聽啦!......哎,
阿仙奴嬴曼聯二比一添!
1999年8月2日
下晝去interview果陣, 居然有個讀CU MBA o既人in埋同一份工, 認真淒涼. 不過佢真係好唔掂, in果陣居然電話響喎, 真係離譜, 唔怪之得佢仲未搵到o野做啦! = P......不過今日in得有D求其, 但係都總算比我過到骨啦. in完之後已經眼訓到死, 番o左屋企搵周公lu!
1999年8月3-4日
無得in, 好灰心, 好頹, 無o野好講. = (
1999年8月5日
今日同Dilys個friend講開, 原來佢in o既工同我都差唔多, 同埋聽到佢講佢D
friend好多都未搵到o野做, 個心都安樂D......近掛心情好差, 成日都訓得唔好,
又未搵到o野做, 唉, 都唔知等到幾時先至搵到o野做....... = (
My
Favourite Hacken Lee's Songs至愛克勤正歌
