史諾比與查理舊事記(1)
18th December, 1998 to 15th April, 1999
今日o左一件好有意義o既事, 就係同Cat姐去o左太空館睇"埃及之謎"啦! 講個秘密比大家啦, 我咁大個女都未過太空館o架! 不過睇睇o下, 有個人o係我隔籬o訓著o左喎......邊個?心照啦 ......嘻嘻
12月22日
今日再做冬, 不過又係打邊爐, 有D悶......
12月23日
買o左本史諾比書, 得閑搵人scan幾頁比大家睇o下啦, 好鬼死好笑嫁!
12月24日
今日去o左Susanna屋企, 睇o左一隻好鬼死悶o既vcd, 悶到嘔電......
12月25日
今日去o左睇"埃及王子"呀! 幾好睇o架! 大家不妨去睇睇啦!
12月28日
同o左D小學同學去食飯, 雖然大家己經有一排無見, 但係唔知點解, 我覺得好開心, 因為同佢o地一齊, 可以令我記番以前小學o既傻事, 講親都笑到死. 有D事我都己經唔記得啦,但係當佢o地講番起o既時候, 我又好似記得番D, 感覺真係好得意o架! : )
12月31日
今日我睇o左"情約今生"啦, 呢套戲真係好好睇, 好touching, 唔止係睇好有型o既Brad Pitt,仲令到我感覺到, 人始終都係要死, 只不過係遲定早, 要死好容易, 但係能夠o係自己死之前同自己鍾意 o既人一齊, 咁都死得安樂啦. 死得開心!係咪?
1999年1月1日
祝大家新年快樂!! 各位至愛身體健康! 學業進步! 工作愉快! 青春常駐! 蜜運常行! (<---可圈可點)......
1999年1月2日
好悶呀!
1999年1月3日
撞到一個好耐. 好耐無見o既netfriend, 真係好耐無見啦! 朋友, 你好嗎? (<---要用印度腔讀至得) = P
1999年1月4日
收到一個好突然o既消息, 嚇親我呀!
1999年1月5日
今日我去o左Times Squareo既Shooter 52食飯, 好得意, 食得好開心.....! 多謝波士! =P
1999年1月6 - 8日
要做功課, 無事可記......~_~
1999年1月9 - 14日
死啦, 條term essay做極都未完......日磨夜磨, 結果都係差唔多, 有邊個可以打救下我呢個可憐o既小朋友? 比D實際行動支持下好喎!
1999年1月15 - 21日
哈哈, 終於做完條term essay啦, 好開心呀......不過開心完唔夠一日, 又要做兩份......都係要做......又咳到死,
好似肺癆咁......聽日去睇獸醫呀......好驚呀......=P
1999年1月22 - 28日
我o既咳仍然未好, 真係好擔心係肺癆, 獸醫真係唔掂......仍然係未做晒D功課, 好在有得delay ...... 今個星期有好消息, 又有壞消息, ...... 聽到個壞消息, 個心好唔安樂, 希望人人都無病無痛, 大家都咁開心就好, 但係世事邊會好似想像中咁完美呢? 唉......~_~
1999年1月29 - 31日
終於send o左我條term essay啦, 嘻嘻. 好開心呀!
1999年2月1日
死啦, 又要作一篇短篇小說, 大家有無D好題目俾我?
1999年2月2 - 10日
哈哈, 大家至愛o既我終於復活啦, 所有功課暫時都叫做交晒, 又作o左一篇超勁老土o既短篇小說, 老土程度......100%...... =P o黎緊仲要作多首七律......相信係另一次肉麻之作
1999年2月11 - 13日
唔經唔覺, 又過年啦, 我近排成日都不事生產, 淨係識行街......無鬼用
1999年2月14日
今日係情人節, 本來係一個好溫馨o既節日, 但係我覺得一D都唔開心, 自己孤零零一個人過, o諗o左好多o野, 覺得自己好白痴, 渡日如年......學得阿John o既info話齋
"情人節?我話係
懲人節......."
好o岩我o既心情
1999年2月15 - 24日
呢十日o既心情都好反覆, 時好時壞, 雖然已經過o左新o既一年, 但係新一年並無為我帶o黎新o既希望, 反而仲有更多o既失望,有時覺得好唔開心, 但係有時又好似好有希望, 人真係矛盾.....
1999年2月25日
今日終於可以為自己做一個決定, 咁大個女, 最大決心都係今次, 不過, 最終結果都係要等到星期日至知, 希望唔會係一個壞消息啦!
1999年2月26日
消息終於揭盅啦, 效果出o黎都幾好呀, 都幾開心, 可以話係一個happy ending......哈哈哈, 原來我都唔係好肥, 咁耐以o黎o既減肥終於有少少效, 都不枉我咁忍口, 嘻嘻嘻嘻......沾沾自喜......個人瘦o左著衫都有信心o左, 又著得好睇, 尤其係著條新裙, 有人讚我好睇呀......哈哈哈哈, 飲得杯落啦, 死......唔掂......一暴飲暴食又肥番......前功盡廢添......慘啦!!!!
今日學識o左好多o野呀, 以前o既我做人真係好衝動, 人o地有小小o野唔o岩就會鏟到人上天花板, 但係今次無喎, 反而仲好大方得體. 心平氣和, 可以話係一個大突破. 大進步!!! 真係唔俾兩o下聲自己都唔得, 因為我今次實在係太過有型啦!
醒兩句史諾比與查理o既金句俾大家 :
"人一世會做兩件事, 當你一開始去做, 你就會去做第二. 三. 四. 五. 六......次, 呢兩件事係咩? 一件係講大話, 另一件係後悔"
"人係犯賤o既"
1999年2月27日
今日再求o左一枝簽, 係六十六簽, D簽文話我幾好喎! 之前求果枝都幾好, 係六十八簽.
1999年2月28日
後日就係元宵啦, 好可惜, 今年元宵仍然要孤零零一個人過, 大家快D安排D節目比我啦,不過唔好叫我走落街猜燈謎喎!
1999年3月2日
今日係元宵, 本來應該人月兩團圓, 好開心至係, 但係我一D都唔開心. 呢排好多o野都唔順利, 個人好煩. 好燥. 睇番自己之前o既日記, 日日都幾開心, 但係呢排就有好多濕滯o野發生o係我身上, 希望媽咪買番o黎個風車可以轉走晒自己D衰運啦!...... 睇番自己舊年去旅行o既相, 全部都笑得好開心, 但係點解近排咁唔開心呢? 大家可唔可以幫幫我? o野又食o左好多, 又買o左好多, 但係仲仍然唔開心. 究竟係我唔知足, 定係其他原因呢? 有無人幫o下我? 如果錢係買到快樂, 咁我真係好想而家即刻落街買D"快樂"番o黎......以前吱吱喳喳o既史諾比究竟去o左邊呀? 見到佢唔該通知聲話我搵佢啦!
1999年3月3日
唉......又要作文啦, 成日都要寫埋D老土o野, 真係好鬼死悶呀, 今次好想寫D平時生活o既o野, 我突然o諗起o係街邊食魚蛋呀, 有無D咩idea比我呀? 終於可以搵到一樣o野可以令到係自己近排覺得開心D o架啦, 哈哈哈! 其實我真係好想而家立即有魚蛋食o架, 好耐無o係街邊食魚蛋啦 ......近排成日都令身邊o既朋友擔心我, 真係覺得唔好意思, 不過真係好多謝大家用咁多時間聽我講廢話, 真係好多謝大家咁關心我!
1999年3月4日
今日有個好消息呀! 史諾比一個唔覺意瘦o左成兩磅幾, 都唔知應該係開心定唔開心, 因為係因為唔開心, 就會發o左神經咁狂食o野, 但係開心果陣又要就住就住咁食, 又一次證明o左人係犯賤o既......電腦真係偉大, 可以比史諾比得閑吹o下水. 發o下牢騷, 如果無電腦, 我就淨係會o係自己本日記裏面不停咁寫, 有咩都係收收埋埋自己知, 遲早谷死, 多謝電腦呢樣發明o既人!
1999年3月5日
今日下晝食飯好開心呀, 成餐飯淨係嘻嘻哈哈咁笑. 不過一靜低落o黎, 班朋友唔o係自己身邊果陣, 就會覺得好驚, 真係好怕呢種感覺, 好怕一個人. 無人理我o既時候, 果種無人關心o既感覺, 會令到我o諗起好多近排唔開心o既o野, 希望快D雨過天晴啦, 不過, 都係唔好希望咁多啦, 如果唔係, 咪盞好似今日咁又失望多一次......
1999年3月6日
史諾比今日心情已經好番好多啦, 人會從經驗裏面學習, 唔好太過執著, 如果唔係盞攪到自己成日都唔開心. "得快樂時且快樂", 呢句說話講得真係好, 我以後都會咁做o架啦!
係呀, 有人話我o既diary好感性, 其實一D都唔感性, 係......性感至真......哈哈哈哈哈哈
1999年3月7日
今日去o左中大影畢業相呀, 不過主角唔係我, 而係Judith姐同我個小學同學泳哥, 雖然影o左無耐就已經天黑, 但係我真係好開心呀, 我家姐話我仲緊張過主角喎. 梗係啦, 一個係識o左十幾年o既小學同學, 一個係識o左十年o既中學同學, 梗係要著得靚D啦, 我好少著得咁斯文o架, 成日都粗粗魯魯, 今次搶晒鏡啦, 嘻嘻. 但係佢o地個個都著得好casual, 我又似乎著得誇o左小小, 點都好啦, D相影得開心咪得囉......哈哈......係呀, 擒日買果扎玫瑰同太陽菊比D太陽晒到肉酸到死, 不過影出o黎又唔錯喎, 哈哈哈哈
1999年3月8日
我已經o諗通晒啦, 其實成日唔開心又有咩用囉, 不如實實際際, 做o下自己o既正經o野仲好啦, 成日都o諗埋D無無謂謂o既o野, 又有咩用? 不如做o下功課仲好啦.
1999年3月9日
近排天陰陰, 真係令到人好煩, 成日個人都好似死o下死o下咁, 好唔開心, 個人懶洋洋, 咩都唔想做. 加埋隻死人腳又痛, 真係好唔掂, 唉, 點解我每次覺得唔舒服又或者唔開心果陣, 點解無一個人關心o下我? 我o既要求好簡單o者, 問我一句死得未就夠o架啦, 邊個好心人睇到呢段日記, 唔該發個輪比我呀, 屋企D電話次次都唔係搵我o架......
1999年3月10日
今日有人問我黎明係咪入o左醫院, 黎明有無入到醫院我唔知. 亦無興趣知, 但係我就快腳痛到入醫院就淨係得我自己知......
1999年3月11日
今日又發生一件唔如意o既事, 唉, 個人又開始唔開心, 成兩個禮拜不停咁唔開心, 又有時會開心番DD, 好反覆......唔知點解, 突然間覺得自己成日都無咩planning, 成日都唔知自己想做D咩, 漫無目的, 覺得好擔心. 好徬徨, 都唔知點算. 身邊o既人已經plan好晒將來做D咩, 但係自己仲係烚o下烚o下......唉, 真係無鬼用......
1999年3月12日
近排真係好多功課做, 次次都做到好夜, 當我做得好辛苦果陣, 真係好想有關心我o既個人可以問o下我點, 或者借個膊頭比我挨o下, 聽我講o下廢話......但係呢個人究竟o係邊度? 我真係好想搵佢呀, 見到佢唔該通知聲啦, 或者比呢段尋人啟事佢睇睇:
尋人
現尋關心史諾比之人乙個, 如有拾獲, 請立即醫貓給我,
1999年3月13日
好開心呀! 今日終於可以成功咁加o左個page counter落去啦, 我真係整o左好耐o架啦! 嘻嘻, 有D成功感啦. 係呀, 有人話鍾意我o既日記喎, 老實講, 我自己都好鍾意o架, 唔單止可以比大家了解我多D, 又可以比自己吹o下水, 真係唔錯o架, 不過近來太多o野要寫啦, , load個page要好耐, 都要o諗o諗辦法分頁至得......係呀, 我又迎加o左個Q & A Session, 歡迎大家比D comment我, 又或者問o下關於呢個homepage o既o野, 有時間就睇o下啦! (公然賣廣告)
1999年3月14日
天陰陰, 特別容易令人覺得煩, 以前覺得自己好樂天, 咩都唔駛o諗, 生活好簡單, 但係而家覺得自己好天真. 好白痴, 成日唔為自己plan o下將來係點, 次次都係臨急抱佛腳, 唉, 真係無用 ......又覺得自己好失敗, 做親樣樣o野都半桶水, 做得好無人會讚你, 做得唔好就永遠都會有人話你, 真係好灰心......見到人o地愛情事業兩得意, 自己就愛情事業兩失意, 真係覺得好灰心...... = (
1999年3月15日
今日同Brenda傾開, 原來大家都好怕比D世叔伯問開畢業之後會做咩, 其實除o左怕比人問呢條問題之外, 我仲怕被人問有男朋友未......由Year 1到 Year 3都不斷比人問, 都唔好意思答, 次次都係笑笑口就算, 唉, 點解D Uncle Auntie咁鍾意問埋D咁o既問題o架, 條條都咁難答o既! 係呀, 今日睇番張幼稚園畢業相, 又笑到碌地, 個個樣都係而家o既cute版, 好盞鬼, 好鬼死得意......係呀, 尋日同泳哥講開, 先發覺大家原來係幼稚園同學, 數埋都識o左廿年啦, 不過大家仍然係叫全名......哈哈, 可能呢D就叫做親切感啦! = P......嘩, 好開心呀, 聽日又有假放, 我近排好少出街食晚飯啦, 大家睇到呢段留言, 好心就約o下我啦!
1999年3月16日
嘩, 今日真係好乖呀, 放假都無出街(其實係無人約至真), 仲要幫媽咪拖地. 做家務, 真係好充實呀. 好耐未試過咁乖女啦! = P 今日o諗通o左啦, 唔好再o諗埋D無無謂謂o既o野.比心機做o下D正經o野仲好啦, 無謂再為人o地o既一句說話唔開心啦, 當佢透明咪得囉!
1999年3月17日
哈哈哈哈. 今日上專家詩果陣真係好笑呀, lecturer比o左幾個香港o既地方名叫我o地對, 其中一個係"八仙嶺", 我就發口痕, 用"三聖村"對(三聖村係屯門一個公屋), 點知果lecturer話我對得好喎! 哈哈哈哈. 之後佢又出o左個"尖沙咀"叫我o地對, Dilys舉手對"大窩口", 當時大家都忍唔住大聲笑o左出o黎......哈哈......其實仲有個"赤柱"添, 又睇o下大家識唔識對啦!好耐未試過上堂上得咁開心啦! ......早排買o左套新suit, 試上身果陣, 真係覺得自己大個女o左好多呀! 早排比人話我細路女, 但係細路女始終都會大個o既, 嘻嘻!
1999年3月18日
一到Year 3就好煩, 又要做功課,又要考試, 又要搵工, 一見杜鵑花開, 就開始騰雞, 真係好唔掂. 近排好唔開心, 有人就同我講(呢個人平時好少講D咁正經o既o野), 唔好再唔開心啦, 好好地咁enjoy埋呢幾個月o既final year o既生活仲好啦, 我覺得真係好有道理. 好o岩, 所以我唔會咁傻. 再唔開心o架啦. 我開始enjoy我呢幾兩個月o既 U life, 好似今日下晝咁, 我就同我至愛Shannon去壽司, 又好味, 又食得開心, 如果真係要番工o既話, 就無咁悠閒啦. 點都好啦, 我要開始搵o野做, 開始重新做人! 發憤圖強! = )
1999年3月19日
今日同Morning飲茶, 講開我瘦o左, 唔知點解大家都唔信係真, 大家都異口同聲話個磅壞o左, 有無攪錯呀? 我分開o係唔同地方磅o左兩次, 兩次都係瘦o左喎! 有咩理由係壞磅喎?! 點都好啦, 我會繼續我o既減肥plan, 一定要瘦多兩磅先會收手, 成日做事都無恆心. 半桶水, 今次一定要減到至得! 心情開始好番, 唔會再為D無謂o既事同人唔開心. 唔知點解, 有兩樣o野好想做, 一樣係睇戲, 另外一樣係唱K, 呢排好多好戲睇, "寫我深情". "一個快樂的傳說"同埋"狂林戰曲"我都好想睇, 不過我最怕排隊買飛, 邊個好心o既話唔該幫我買飛啦, 嘻嘻嘻嘻......唉......我真係好想唱K呀! 好鬼耐無唱過啦, 真係好想唱呀......
1999年3月20日
今朝晨早走去補習, 果個細路成日好似死蛇爛鱔咁, 懶到死, 有時真係比佢激到嘔電. 點都好啦, 受人錢財, 替人消災, 無辦法......今日聽o左隻好耐好耐o既碟, 最鍾意聽"仍是老地方", 好正.唔知點解, 好鍾意聽D慘o既情歌, 雖然會越聽越唔開心, 但係真係好enjoy......約人o既老地方, 我都有, 最記得o既就係尖沙咀地鐵站九龍公園出口同五枝旗桿, 因為果兩度都好多人, 認人好難, 次次都係人o地叫我我先見到......突然又o諗番起隻歌裏面o既幾句歌詞......"景況依然, 仍然默默獨自雨裏這花店等候, 無言靜候你卻遠去永不再出現, 垂頭默念甜言蜜語共溫柔, 你可知否?"......景物依舊, 人面全非, 果種感覺真係慘......
1999年3月21日
唉, 心情又開始唔好, 條term essay做極都好似無咩進展, 好唔掂......唔知係咪習慣o左呢, 而家o既日記全部都係用電腦打出o黎, 睇番本日記, 由二月廿六號已經停落o左o黎無寫過, 差唔多一個月啦, 所有o野都成為習慣, 習慣成自然. 好多謝大家對我呢part廢話日記o既支持, 間不中睇o下我吹水, 多謝多謝! 我發覺ICQ o既info對我好有用, 得閑用o黎打o下自己最鍾意o既歌, 鬧o下最憎o既人, 講o下最開心o既事, 或者最唔開心o既o野, 唔會個個人得閑update, 但係當有人睇到. 有同感果陣我又會覺得開心, 原來開心就係咁簡單, 做人何必太複雜呢?
1999年3月22日
嘻嘻, 好開心呀, 有人話我個info講得好 ---"永遠快樂,一生無憂"---其實呢句說話係我o係呢一個月裏面自己o諗通o左而得出o黎o既結果. o諗番起呢一個月, 真係好傻, 成日為o左小小事, 又或者一D人, 又或者人o地o既一句說話而唔開心, 真係無謂. 可能有人認為我o既o諗法仍然好細路女, 但係o係呢一個月以o黎, 我覺得自己已經變o左好多, 雖然變o既程度唔大, 但係已經比以前好好多. 忍耐力比以前好o左, 識得自己開解自己, 獨立去面對自己o既問題, 唔會再好衝動, 以前樂觀o既我依然樂觀! 呢個先係本來o既我嘛! = ) ......點都好啦, 多謝晒近排成日睇我日記. info o既人, 多謝你o地聽我講廢話. 問o下我o既近況! 我已經回復以前o既狀態, 鍾意窒人. 笑人. 吹水. 講笑果個史諾比已經番o黎啦! 恭喜恭喜!!!! = P
1999年3月23日
無驚無險, 又過一天, 真係好啦! 今日勉勉強強叫做交o左份功課, 果人真係輕鬆o左唔少! 做完一份功課, 好想獎勵自己, 出去食一餐晚飯, 但係又無人約, 自己約人又怕人o地話 : "唔好意思喎, 我近排好多o野做呀!" 比人拒絕果種感覺真係唔好受, 唔怪之得男仔咁怕食檸檬啦! 好心人如果睇到呢段message就約o下我啦! 唉......不過睇o黎都係無人睬我o架啦, 次次o係呢度叫大家搵我. 食o下飯. 傾o下電話, 次次都係無結果o既, 得自己一個傻婆o係度講......如果今晚真係有人搵我食飯, 就算去到上水我都會飛撲出去o架!
1999年3月24日
近排做o野做到個人好殘, 一磅先知, 原來突然間又瘦o左兩磅, 雖然係瘦o左, 但係覺得自己瘦得o黎有D唔健康, 個人好似無晒神咁, 加埋早排成日唔開心先至會突然間瘦鬼咁多. 最需要o既係人o地o既關心, 所以成日都問人有無掛住我, 就算果個人講笑話有用個衣架掛住我已經會好開心o架啦. 有時人就係咁容易開心o架啦! 一個電話. message或者一句關心o既說話對於我已經好足夠, 做人何必太貪心呢?
1999年3月25日
今日去o左唱K, 買o左隻"霧之戀", 又買o左對鞋, 用o左咁多錢, 有D肉痛, 但係又好開心喎. 其實人只要開心, 又唔會麻煩到人, 又害唔到人, 何樂而不為喎? 不過話雖如此, 駛得錢多, 始終都唔係幾好o既, 不過又唔係喎, 整得自己靚D又真係開心Do架喎, 嘻嘻......人真係矛盾啦! = P頭先聽到有個friend話 "日日都有D唔開心, 睇下係多定少!" 其實係睇你個人本身睇唔睇得開o架o者. 我早排都為o左小小o野好唔開心, 但係當睇通晒所有o野之後咪又係一條好漢! 我覺得自己無o野好, 唯一好係個人夠樂觀. 大家都學o下我啦! 嘻嘻! 係喎, 大家睇我吹水之餘, 都可以比番自己o既comment o架喎, 得閑簽簽我本guestbook啦, 好耐無發過市啦! 如果唔鍾意比人睇, 可以set做private message, 又或者醫貓比我, 有時間而又八卦o既話, 又可以睇o下我本guestbooko架!
1999年3月26日
睇番呢一個月o黎o既日記, 發覺自己o係呢一個月o既情緒都好唔穩定, 時開心時唔開心, o係呢一個月裏面, 真係變o左好多. 一個月對於以前o既我好小事, 但係o岩o岩呢一個月, 對於我o黎講真係好難捱, 不過都捱過o左啦! 時間對於人o黎講好緊要, 可以用o黎忘記唔開心o既o野, 又可以用o黎做D有用o既o野, 原來時間係可以咁用o既! = )
1999年3月27日
今朝晨早走o左番去test Ed Cert, 早到成班中文系o既人, 真係嚇親, 知道自己一定係陪太子讀書,不過既然都比o左錢, 不妨就去test o下囉. 不過相信都無咩機會啦. 唯有疊埋心水搵o野做啦! 臨走果陣見到Donald, 好耐無見過佢啦, 肥o左小小, 不過我都仲認得! = P ......今日有D黑, 差D由電梯碌落去不特止, o係街行行o下又差D跌o係度, 個人唔知點解咁鬼死失魂......
1999年3月28日
今朝一早就要出門口拜山, 完全唔想起身, 不過清明係一年一度, 早D起身都無所謂啦!
拜山果陣, 我除o左希望祖先保佑全家平安. 順順利利之外, 仲靜靜雞為自己許o左個願,
希望祖先保佑自己學業進步. 身體健康. 搵份好工, 當然搵到個好老公仲好啦! 嘻嘻......
= P
1999年3月29日
就快復活節, 有人o係ICQ send o左復活蛋比我, 突然間發現自己從來未收過復活蛋喎! 淨係o係小學用發泡膠整過隻爛鬼勞作復活蛋比自己咋! 次次行過美心, 都好想買隻Snoopy復活蛋比自己, 好鍾意個盒, 但係無理由為個盒而買隻蛋嘛, 我又唔係太鍾意食朱古力, 雖然係廿蚊, 但係都要用錢買o架! 唔好啦, 都係慳番廿蚊仲好啦, 嘻嘻! = P
1999年3月30日
頭先o岩o岩收到exam timetable, 嘩, 發癲o架, 連續四日都有考試喎, 發神經o架! 唉, 咁考法都唔知點算好, 睇怕晚晚都要讀到三. 四點, 甚至乎通頂至掂啦......大鑊! 實死無生......救命呀! = .. (
1999年3月31日
哈哈, 今日真係要多謝Dilys呀, 如果唔係佢, 我都唔可以慳番三百幾蚊呀! 遲D就可以有一個新形象啦, 好緊張. 好開心. 好興奮呀! 突然間好想快D到四月十九號o添......不過都係唔好啦, 過o左四月又要考試......都係唔好啦, 寧願唔靚都好過要考試啦......不過都唔到我講啦......唉......
1999年4月1日
今日收到兩個消息, 一個開心o既, 一個唔開心o既, 其實呢幾日心情都唔多好, 好反覆. 好想搵人傾o下, 但係又知道大家都好忙, 唔敢煩住人o地. 唯有等遲D人o地得閒先聽我講啦, 不過我真係好想搵個人靜靜地咁聽我講o下o架. 不過都係算啦, 咁大個人, 自己開解自己咪得囉, 唔好再要人為自己煩多樣o野啦, 大個女啦嘛!......睇番泳哥(應該係泳仔至真)寄番比我果D畢業相, 笑得幾開心o架, 但係近排好多o野煩, 又唔開心啦......唉, 邊個可以幫幫我?
1999年4月2日
晨早走o左去補習, 但係個人精神好好, 因為擒晚食完飯無幾耐就訓著o左啦.
加埋補習個細路有心機o左, 個人心情都好D = ) ......今日係假期, 好想搵個人陪我出去食飯,
但係又懶打電話, 都係算啦, 無人約咪"柄"o係屋企囉, 呢個幾月以o黎都無人約我出去食晚飯
o架啦! 突然間好想快D生日o添, 最好大家都記得喎,5月28號呀!
記住送禮物比我喎! 嘻嘻嘻嘻......= P
1999年4月3日
又係補習, 又係做功課, 呢D咁o既生活真係有D厭, 但係o諗起遲D就要做o野, 又唔太想 ...... 好想搵一個舊朋友, 但係佢成日都話自己好忙, 最怕食檸檬, 所以都係決定唔叫. 索性"柄"埋o係屋企五日就算. 無人陪, 咪留係屋企玩手指囉...... = (
1999年4月4日
今日係兒童節, 見到報紙上面介紹果D兒童餐, 我都好想食呀, 不過又無人陪, 唔通大"東東"一個人走去食咩! 我好想收到兒童節禮物同復活蛋呀! 邊個可以送比我呀?
1999年4月5日
晏晝果陣阿謝打電話比我, 又係叫我去果D咩咩大聚會, 我真係唔想推佢, 但係我真係唔鍾意番果D咩鬼會, 唔單止唔鍾意, 直頭係怕o左果D信教o既人, 我明白佢o地係出於好意, 但係我真係唔鍾意領呢D情, o係度同阿謝講聲sorry啦! 希望大家唔好再勸我番D咩咩教會啦, 我心領啦! 我而家好enjoy我o既生活, 唔需要主呀. 神呀. 咩呀咁教我人生o既道理, 唔想食我o既檸檬o既話, 就唔該唔好再叫我番教會, 費事大家攪到大家無癮啦! (其實o諗籍口去推你o地, 我自己唔好意思之餘, 有時覺得攪到你o地都唔好意思, 你o地唔好再浪費你o地珍貴o既口水去叫一個永遠識帶人遊花園o既人番教會啦, 唔該晒!)
1999年4月6日
報時訊號一響, 而家係1999年4月7日早上2時正. 今日咁遲先寫日記, 係因為要做至愛o既黎活仁教授份功課, 部死人電腦又唔夠Ram, 攪到我做o左鬼咁耐, o係度同追開我o既日記o既各位至愛say sorry啦.......近排個人好似心理失調咁, 成日亂發脾氣, 日日都好似"赤口"咁, 得罪好多人, 係唔敢想像遲D考試果陣會變成咩衰樣...... 終於還清晒所有功課債啦, 但係考試又殺到, 真係跳樓都唔掂. 不過點都好啦, 我會叉一叉電, 之後又要立即再博殺啦, 真係好可憐, 不過如果大家比D精神上(最好係物質上)o既鼓勵我就更加好啦, 嘻嘻! 唉, 算啦, send封貓支持我都收貨啦.
1999年4月7日
為o左慶祝我今日清晒所有功課, 我今日同完Shannon同四哥食完飯之後, 同Dilys再去K唱歌, 原來Dilys唱歌都唔錯o架! (因為佢睇唔到呢篇日記所以先讚佢, 費事佢hill啦)無情情又做o左加州紅o既member, 不過mem唔mem都係咁鬼死貴! 過o左今晚之後, 就要比心機溫書lu! 係呀, 今日食飯果陣, 傾開先知原來自己都好多年未行過山lu, 講開真係好想去, 行到上山頂, 望番落去, 真係好有成功感o架, 若果有埋靚風景就仲正啦! 不過四哥話o係去行山之前, 要搵個"識大隻"o既人喎! 哈哈, 四哥死雞撐飯蓋呀! 四哥, 真係唔好意思啦, 係呢度當眾出賣你, 講你D瘀o野, 希望你唔好介意細路仔亂講o野啦, 哈哈哈哈!
1999年4月8日
真係難得啦, 今日終於可以約齊四大天后一齊食餐晚飯, 話時話, 四大天后好耐未一齊食過晚飯啦, 記得對上一次食飯己經係舊年暑假啦, 真係好耐之前. 四大天后食完飯又要比心機溫書lu. 大家記住支持我呀! 今晚真係好開心, 一來好耐未出過街食晚飯, 二來四大天后be li ba la, 好正呀, 無人會話我講o野大聲, 唔斯文, 好free呀!
1999年4月9日
唉, 就快比補習個細路激到嘔電, 成條頂心杉咁......今日個人有D躁, 若果同一個人問同一個問題兩次, 我就會開始唔耐煩, 所以大家唔好重複問我同一條問題兩次, 如果唔係我就會控制唔到自己, 又會唔耐煩......哈哈, 有人應承送生日禮物比我呀......哈哈哈......屈人係我o既強項!
1999年4月10日
頭先睇到一個電視節目, 見到一個只係得廿零歲o既女仔, 佢視網膜衰退, 好快就會睇唔到o野, o係佢就快盲之前, 佢最想係見到佢識o左兩年o既netfriend, 一個就快盲o既人o既心願原來係咁簡單, 睇完果個節目之後覺得好touching, 好想喊o架! 覺得自己好唔知足, 雙眼睇到o野, 又唔好好o地咁keep住, 真係好怕老o左之後, 有一日會突然之間睇唔到o野, 一片漆黑, 感覺真係好可怕o架!
1999年4月11日
今日好乖女呀, 一早起身就陪媽咪同老豆去飲茶, 雖然果間o野唔係太掂, 又唔係我比錢, 但係我都算係咁啦. 天陰陰, 最怕出街落雨, 結果又"柄"o係屋企......哈哈哈, 臨o係一日埋舟之前有個好消息話比大家聽, 我呢隻懶人居然會有份好功課做出o黎, 哈哈, 成績......唔錯啦, 大家恭喜我啦, 支持o下我啦! = )
1999年4月12日
嘩, 唔掂唔掂, 一個唔覺意又肥番兩磅幾......弊弊弊, keep唔住添, 一定要食少D曲奇......哈哈, 晏晝聽到Morning講果單料, 同Cat姐兩個笑到肚都痛埋, 唉, 原來經濟真係低迷成咁 ......不過呢單料真係好鬼好笑, 第日真係要去o下荃灣街市至得......哈哈......最怕識人做保險. 傳銷同金融, 煩到你嘔電, 又用人o地一蚊電話費聽埋晒D自己最憎o既o野, 又長氣又煩, 好聲好氣推佢仲要繼續sell, 硬係要人唔客氣先收聲. 雖知佢o地都係搵食艱難, 但係逼我聽埋D我最憎o既o野我仲淒涼啦......
1999年4月13日
考試越來越近, 但係書仍然未溫, 真係好驚呀! 憂......睇電視見到D細路仔真係好肥, 嘩, 得八歲就有成一百一十三磅, 居然仲重過我咁多, 真係恐怖! 唔掂, 一定要keep, 唔可以比自己有機會好似果個細路女咁, 得個八歲就有兩個大車胎(搵唔到個tyre字), 仲有雙下巴, 唔掂唔掂......
1999年4月14日
真係戥Zenia高興啦, 咁快就搵到份工, 唉, 都唔知自己食白果要食到幾時......
1999年4月15日
今日已經上晒所有堂啦, 三年o既大學生活就快完, 唔知點解, 好有失落感, 突然間o諗起克勤隻告別校園時......"一天一天的我在期待放學,
一轉眼卻要告別校園......"呢兩句真係好o岩我而家o既心情......今日餐勁過飯真係食得開心,
五個女仔be li ba la, 又係食腰果肉丁(禮拜二已經同布布. Morning同Shannon
o係城軒食過一次, 不過好難食), last一次, 真係開心得o黎有D傷感, 點都好啦,
向前看點都好D o既. 星期日約o左成班小學同學飲茶, 好耐未見過佢o地啦, 俞老師都會o黎,
真係難得, 一定要去. = )
My
Favourite Hacken Lee's Songs至愛克勤正歌
