VIVENDA

INTRODUCCIÓN

• Na actualidade, xunto co desemprego, a vivenda é o problema máis acuciante co que nos topamos os e as xóvenes galegos, debido á inestabilidade económica que provoca a precariedade no emprego. A falla de perspectivas de emprego é seguida pola dificultade para acceder a unha vivenda digna.
• Pódese decir, en termos xerais, que un/unha xoven galego/a non pode acceder a unha vivenda porque esta pasou a ter un valor de uso a ter un valor de troco. É dicir, o sector inmobiliario é un sector máis onde a especulación fixa o seu punto de mira por riba de calquera outra circunstancia.
• Todo o dito con anterioridade supón para a xuventude, habitualmente, unha maior dependencia dos nosos proxenitores, demorándose, a meriande parte das veces de xeito obrigado, o momento da nosa emancipación.

PERFIL E PROBLEMÁTICA DOS E DAS XÓVENES DEMANDANTES DE VIVENDA

• Dado que existe certa variedade dos perfís dos posibles afectados, podemos describir algúns dos perfís máis representativos da xuventude respecto á problemática do acceso á vivenda:

XÓVENES TRABALLADORES/AS TEMPORAIS DO MEDIO RURAL

• Caracterízanse por desenrolar traballos esporádicos e temporais, coincidentes normalmente coas épocas das colectas de productos agrícolas. Permañecen un curto periodo de tempo, poucos meses, en varios lugares distintos ó cabo do ano. Ofréceselles auténticas chabolas sen condicións de habitabilidade, onde faltan servicios sanitarios, con masificación de persoas e familias.

XÓVENES TRABALLADORES/AS DESPRAZADOS Ó MEDIO URBÁN

• As características deste perfil varían en función da duración do seu desprazamento, prolongándose dun xeito estable - incluso anos- en función do lugar onde o xove desenrola o seu traballo. Ocupan vivendas en condicións precarias de habitabilidade e a prezos excesivos. Descoñecen o mercado inmobiliario.

XÓVENES CON INTERESE DE EMANCIPARSE

• Ocorre con numerosos xóvenes que, non pertencendo a ningún dos grupos anteriores, pretenden emanciparse dos seus pais e independizarse, formando un novo fogar, xa sexa unipersonal, en parella ou como familia tradicional. A independencia familiar pasaría, neste caso, por unha primeira etapa en réxime de aluguer deica conquerir unha solvencia económica tal que lle permita unha adquisición en propiedade.

ESTUDIANTES DESPRAZADOS

• A xuventude que estudia fora da súa localidade de residencia vése na obriga de desprazarse a outros núcleos urbáns, onde poden recibir a formación que demandan. Ocupan vivendas en aluguer en condicións irregulares, con contratos precarios, moitas veces por descoñecemento propio, chegando a perder incluso as fianzas depositadas ó comezo do seu contrato.

OS OKUPAS

• Este colectivo, formado básicamente por xente nova, responde a unha filosofía de vida comunitaria, emancipada e autoxestionaria, con raíces no socialismo utópico ou no comunismo libertario.
• Caracterízanse por formalizar unha crítica radical da nosa sociedade e dos valores que a vertebran: individualismo, mercantilismo, etc. No eido social, os Okupas, a traverso das súas accións de ocupación e da ‘rehabilitación’ de vivendas desocupadas, abandonadas e sometidas á especulación urbanística, están chamando a atención sobre dito problema. Na actualidade sufren unha forte represión dende a subida ó poder da dereita.

Os problemas descritos en todo o antedito pódense resumir en:

1. - Indefensión da xuventude galega ante a agresividade do mercado inmobiliario, propiciada polo noso descoñecemento da realidade e dos nosos dereitos como usuarios de vivendas.
2. - Precariedade nas condicións das vivendas e dos aloxamentos existentes, ante a falta de motivación da oferta.
3. - Falta de compromiso das diversas administracións e institucións ante a nosa problemática arredor da vivenda.

AS NOSAS PROPOSTAS

Para tentar poñer remedio a estas circunstancias, Xuventudes Socialistas de Galicia propón o seguinte:

• MEDIDAS DE CARÁCTER XERAL
• Loita contra a indefensión: Intervención directa das administracións e axentes sociais implicados -sindicatos, organizacións xuvenís, asociacións de consumidores, etc.- co fin de velar polos dereitos dos xóvenes de acceso á vivenda.
• Concienciación do colectivo xuvenil na esixencia dos seus propios dereitos como usuarios e consumidores. Evita-la precariedade nas condicións das vivendas e dos aloxamentos existentes: Motivando ós distintos axentes e administracións implicados -privados ou públicos-, sensibilizándoos coa problemática concreta, de xeito que a oferta se adecúe ás nosas necesidades e dispoñibilidades reais.
• Participación activa no control e seguimento das ofertas de aloxamento polos axentes correspondentes (Xunta, universidade, concellos, organizacións xuvenís, sindicatos, etc.)
• Compromiso por parte das distintas administracións galegas para o seguinte: Deseño de programas específicos para a xuventude, xa sexan promovidos polas diferentes administracións ou por operadores privados, garantizando unha demanda adecuada que regule o mercado inmobiliario.
• É necesario, xunto coa política de vivenda, ó xuízo de Xuventudes Socialistas de Galicia, unha política de CHAN, baseada en:
• Garanti-la oferta do chan para vivendas de protección oficial.
• Revaloriza-las áreas marxinadas.
• Asegura-lo mercado cunha oferta constante a longo prazo.
• Articular mecanismos e instrumentos para loitar contra a especulación do chan e obrigar a que os terreos improductivos e abandonados poidan ser expropiados a instancias municipais ou petición cidadán, acompañando medidas fiscais que graven a non construcción.
• PROPOSTAS E LIÑAS DE ACTUACIÓN EN TORNO Á VIVENDA XOVEN
• Propostas:
• - Autoconstrucción. Xuventudes Socialistas de Galicia demanda novos programas de autoconstrucción, especialmente apropiados ás condicións da demanda xoven de vivenda, como poderían ser aqueles aplicados a crear vivendas ampliables a partir dun núcleo básico, ou ben aqueloutros nos que, partindo da edificación executada polos profesionais nas primeiras fases das obras, incorporan ó autoconstructor nas fases finais -máis asequibles-, permitindo a toma de decisións sobre calidades e deseño interior.
• - Infravivenda e marxinación. A organización xuvenil do P.S.deG. cre necesario prestar atención ó fenómeno da ‘OKUPACION’, presentándoo como unha consecuencia do problema social.
• - Desenvolvemento dun extenso e profundo traballo social que serva de estímulo deste colectivo. É necesario potencia-lo asociacionismo e a participación e facilita-la convivencia e a integración social.
• - Potenciación das cooperativas de vivendas xuvenís. A cooperativa é de extraordinario interese no eido das vivendas para a xuventude, na medida en que supoñen a creación de entidades privadas de interese colectivo en función da mediación social.
• - As cooperativas de vivendas teñen como fin último a adquisición da vivenda en propiedade. Cabería o caso de cooperativas de vivendas xuvenís -a traverso de fórmulas mixtas- que permitisen a compra e arrendamento na mesma actuación. Neste senso, o problema fundamental é a financiación, establecéndose, obviamente, fórmulas de apoio.
• - Apoiamos a non concentración en áreas localizadas de vivendas de protección. Apostamos por integrar estas vivendas por toda paisaxe urbá, para evita-la creación de zonas marxinais.
• - Aparte da construcción de V.P.O.s, a Xunta debe dispoñer dunha rede de pisos non concertados para o aluguer.
• Liñas de actuación:
• Promoción de apartamentos para a xuventude en réxime de aluguer, desenrolando a oferta existente de promoción pública.
• Estímulo e promoción de cooperativas xuvenís de vivendas tanto en venda como en aluguer.
• Programas de autoconstrucción de vivendas.
• Promoción e potenciación das redes de albergues xuvenís como medio de aloxamento de xóvenes e traballadores/as desprazados/as.
• Regulamento dun marco específico de deseño e financiamento para propostas de aloxamento de xóvenes estudantes e traballadores/as desplazados/as, que incentive actuacións máis acordes coa demanda específicamente xoven.
• Creación dunha Bolsa de Aloxamento, co fin de intermediar entre os xóvenes e o mercado libre de aluguer.
• Artellamento de sistemas de financiación flexibles. Créditos brandos. Fórmulas mixtas de financiamento -Administracións e entidades locais, institucións e xóvenes demandantes de vivenda-, para a compra ou aluguer. Mesmo adecuar sistemas de protección para o arrendador por parte das distintas administracións públicas no caso de aluguer de vivendas a xóvenes.
• Recolle-la área de vivenda como un asunto importante no apartado de información por parte da nosa Organización Xuvenil.