Igualdade

Loita contra a Discriminación

• O concepto de igualdade na ideoloxía socialista debe entenderse como fin último do noso pensamento. Deben combinarse tanto a loita pola igualdade xurídica coma a loita pola igualdade real nos ámbitos das actitudes individuais e da convivencia en sociedade. Acada-la igualdade real comeza pola acción individual que procuraremos se convirta nunha acción colectiva. As liñas de actuación neste eido das agrupacións de X.S.G. deben centrarse na loita contra a discriminación:
• Por razóns de xénero.
• Por discapacidade.
• Por procedencia e/ou raza.
• Por situación económica.
• Por ideoloxía política e/ou relixiosa.
• Por orientación sexual.

• POR RAZÓN DE XÉNERO
• A IGUALDADE ENTRE O HOME E A MULLER.
• Conquerida a igualdade xurídica das mulleres con respecto ós homes, o noso traballo débese centrar en acada-la igualdade real nos diferentes ámbitos coma, por exemplo, o acceso á formación, o combate das desigualdades no mundo laboral, a participación da muller nas asociacións e na vida política, etc.
• Fomentaremos as políticas de acción positiva na sociedade que permitan un total desenvolvemento da muller nas diferentes áreas. Potenciaremos: a ruptura dos roles tradicionais e a igualdade de oportunidades no acceso á formación e ó mundo laboral. Pero o modelo igualitario antes citado tamén precisa da promoción da muller nos postos nos que está inxustamente infrarrepresentada, sen que elo supoña chegar a extremos desprezativos cara ós homes, senón que se acometa unha política correctora de vocación provisional ata chegar á definitiva desaparición das desigualdades por razón de xénero.
• Denunciaremos as situacións de discriminación ás mulleres coma son o trato na publicidade, nos libros de texto, nos medios de comunicación, etc.
• Será acción de X.S.G. o traballo pola mellora da calidade de vida e erradicación de situacións desfavorables para as mulleres. Así, loitaremos por:
• - Erradicación das situacións que lles obriguen a exerce-la prostitución, e mellora da situación das mulleres prostitutas, solicitando a legalización do seu traballo.
• - Creación de servicios públicos destinados á integración de mulleres marxinadas.
• - Campañas dirixidas a promove-la denuncia de maltrato á muller na familia.
• - Denuncia de situacións de discriminación ás mulleres seropositivas.
• - Solicitar ás institucións máis axudas públicas para as mulleres con fillos e sen fontes de ingreso.
• Defendemos o aborto libre e gratuíto, contemplado nunha lei que non coharte a liberdade da muller para decidir sobre o seu corpo.
• Reivindicamo-la existencia de centros de atención especializada á mocidade no eido da sexualidade e anticoncepción.
• As agrupacións de X.S.G. farán un esforzo de cara ó achegamento a entidades de mulleres progresistas, ou á creación das mesmas como forma de achegamento á sociedade.
• Defendemos a autonomía, a iniciativa, e a ruptura de vellos roles por parte das mozas da Organización, evitando os perxuízos e comentarios machistas.
• POR DISCAPACIDADE FÍSICA OU PSÍQUICA
• Defensa da política de integración dos disminuídos psíquicos, físicos e sensoriais na sociedade.
• Promoción das formas de integración como son o acceso á formación ou ó mercado de traballo, evitando o illamento en núcleos especiais.
• Esixirase maior sensibilización de cara ás novas construccións nas nosas cidades e vilas, evitando as barreiras arquitectónicas e denunciando aquelas barreiras existentes tanto nas rúas das nosas cidades como en moitos edificios públicos.
• POR PROCEDENCIA E/OU RAZA
• RACISMO E INMIGRACIÓN
• Necesidade de empregar termos positivos no eido da sensibilización e educación no tocante ós temas de racismo e xenofobia.
• A loita pola liberdade, a xustiza, a igualdade, a solidariedade, a integración e a democracia, señas de identidade da nosa política, deben reflexarse na nosa sensibilización de cara ós temas de igualdade, en especial, no tema do racismo e da integración.
• É importante o traballo das actitudes individuais, xa que a discriminación vai máis aló da agresión física ou verbal. Discriminación é a exclusión e segregación debido á orixe étnica, á cor da pel, relixión, sexo, apariencia física, cultura, idioma, ideoloxía, etc.
• O racismo non afecta só á poboación inmigrante (por exemplo, o pobo xitano) nen a tódolos inmigrantes (como os procedentes de países ricos).
• O pobo xitano, legalmente, ten os mesmos dereitos no estado español cós paios, por eso o racismo contra esta colectividade constitúe a violación dos valores constitucionais.
• INTERCULTURALIDADE
• Na loita pola non discriminación racial hai que respetar e defende-los dereitos sociais e civís da poboación inmigrada e das minorías étnicas, apoiando e impulsando todo tipo de actos e mobilizacións de denuncia de situacións de vulnerabilidade.
• Loitaremos polo dereito á residencia, traballo, dereitos políticos, etc., destas comunidades.
• Para acada-la plena integración debe existir unha retroalimentación entre as culturas que conviven no mesmo territorio.
• Debemos rexeita-la idea de asimilación (renuncia a particularidades culturais) para a integración na sociedade das minorías étnicas ou inmigrantes.
• Loitaremos contra o illamento en comunidades pechadas (guetos) que son os que provocan a separación, o descoñecemento entre as culturas e, en definitiva, a discriminación.
• Defenderemos o dereito de cada pobo, grupo étnico, relixioso ou social a desenrola-las súas particularidades culturais, dende unha prespectiva crítica que favoreza a interculturalidade e a integración.
• É necesaria a depuración, por parte das culturas que conviven, dos valores que non favorezan o entendemento e a retroalimentación ou que atenten contra os dereitos humanos. Esto acadaráse a traverso dunha análise obxectiva, non etnocéntrica, é dicir, en igualdade de condicións. Loitaremos contra as visións etnocentristas,é dicir, a crenza na superioridade dun pobo sobre outro.
• Rexeitamos as manifestacións sobre a agresión á nosa identidade provocada polos hábitos dos colectivos inmigrantes.
• A política da U.E. está orientada cara o freno dos fluxos migratorios e a consolidación das diferencias entre dous tipos de cidadáns, que non teñen os mesmos dereitos, en vez de fomenta-la integración.
• Esta política interestatal procede dos acordos de Schengen e Train, fóra do control parlamentario.
• No convenio de Schengen a inmigración, o narcotráfico e o terrorismo aparecen no mesmo apartado, cousa que aporta unha imaxe delictiva da inmigración, fomentando o racismo e a xenofobia. Tamén o trato policial do feito migratorio obstaculiza a liberdade de circulación e residencia.
• Loitaremos polo cambio de política de inmigración, tanto no estado español coma na U.E., baseado na política social e de dereitos fronte á política administrativo-policial actual.
• A inmigración non se para con medidas represivas, senón con solucións internacionais que permitan o autodesenvolvemento dos países máis pobres.
• A integración na sociedade e a pertenza a unha minoría étnica non teñen por qué ser contradictorias. Loitaremos pola consideración de tódolos habitantes dun territorio como membros de pleno dereito (a efectos legais e sociais), e pola posibilidade de poder manter tradicións culturais e organizacións sociais diferentes ás da sociedade maioritaria. A existencia de diferencias culturais non debe supor un recorte dos dereitos sociais e políticos das persoas que as practican.
• Son necesarias estructuras de representación da poboación inmigrada ante as institucións que canalicen as reivindicacións e defendan os intereses destas minorías. Estas estructuras (consellos, fórums, etc.) deberán estar formadas por representantes de asociacións de inmigrantes, O.N.G.s, sindicatos, etc.
• Debemos prever unha inmigración masiva, que podería provocar un retroceso nos logros antixenófobos, debido ó paro e á dura competencia polo emprego que xa existe actualmente, e que se incrementará no futuro. Así mesmo, no caso particular do noso Estado, debemos disminuí-las dificultades que conleva para a sociedade asumi-la integración en Europa no tocante ó aspecto laboral, é dicir, para asumi-la libre competitividade polo emprego. Para lograr esta integración debemos promover campañas de concienciación que demostren que, do mesmo modo que xente doutros países traballa no noso, tamén poidamos acceder a postos noutros países da Comunidade.
• Outro punto a destacar é o afloramento dos nacionalismos radicais. Debemos estudia-las bases reais (económicas) que se esconden detrás de certos postulados aparentemente ideolóxicos para posteriormente concienciar á sociedade dos riscos que supón un nacionalismo exacerbado
• A EDUCACIÓN.
• Existen nestes intres dous eidos de traballo principais:
• - A educación de toda a poboación nos principios de igualdade entre as persoas, a valoración positiva da diversidade cultural e a superación de prexuízos e estereotipos.
• - A educación intercultural alí onde haxa presencia de nenos/as de minorías étnicas.
• A reforma do sistema educativo que se está a implantar, de xeito que contemple a inclusión da educación intercultural como un eixo común a tódalas asignaturas no programa educativo dos centros de ensino.
• Para que esta presencia incida na educación do alumnado, debe concretarse en:
• - Os contidos das materias e nos libros de texto.
• - As actitudes e valores que se transmiten ó alumnado.
• - A práctica dunha política non discriminatoria nin restrictiva que permita o acceso dos fillos dos inmigrantes á escola.
• - O fomento de medidas políticas e sociais para a introducción das rapazas e rapaces xitanos, en igualdade de condicións co resto do alumnado e nos mesmos centros que éstes, para fomentar así a convivencia interracial no sistema educativo.
• - O impulso das intervencións necesarias para evita-lo fracaso escolar desta poboación.
• - O rexeitamento ás cuotas artificiais sobre a presencia de fillos de inmigrantes ou etnias nas escolas e institutos.
• LEI DE INTEGRACIÓN E DE DEREITOS DOS EXTRANXEIROS NO ESTADO ESPAÑOL.
• Deberá de ser recoñecido o dereito a emigrar das persoas e de ser recibidas en calquera país en igualdade de dereitos que os cidadáns do mesmo, recoñecéndose tamén o dereito á libre circulación.
• O novo Código Penal pena as manifestacións máis palpables e continuas de racismo. Debemos loitar para que os actos racistas "sutís" como, por exemplo, a negación de acceso á vivenda e á educación; que presentan dificultades á hora de ser probados, sexan tamén penados. Reflexionaremos sobre posibles medidas a favor da non violación da norma dun xeito sutil.
• Moitas veces as forzas de seguridade, abusando de autoridade, agreden a inmigrantes ou persoas pertencentes a unha etnia. Estes actos delictivos normalmente quedan impunes, xa que, ou ben non se admiten as denuncias presentadas contra a policía, ou ben unha vez admitidas procédese ó seu arquivo por falta de probas.
• Ás veces a actuación da policía fronte ós inmigrantes constitúe unha das situacións discriminatorias e racistas máis graves que sofre esta poboación. O acoso continuo solicitando a documentación públicamente a persoas que, polos seus rasgos físicos, poden parecer inmigrantes (acto racista en sí mesmo), reforza a asociación de inmigración = delincuencia. Os medios de comunicación, cando presentan a orixe como dato importante no caso de delincuentes, contribúen á fixación de características delictivas a todo o grupo.
• Para o tratamento deste tema fai falla, por unha banda, a concienciación social, e, por outra, a perda do medo ás forzas de seguridade. Como xente nova en contra de calquera forma de violencia, debemos denunciar tamén as accións violentas da policía sobre as persoas, e loitar pola erradicación de ideas coma, por exemplo, que tódolos membros dunha minoría étnica son delincuentes.
• Debemos contribuír a que a sociedade se mobilice contra a inxustiza, que non manteña a súa actuación pasiva e permisiva, que implica a continuidade destes feitos.
• DEREITO A VOTO PARA PERSOAS INMIGRANTES E REFUXIADAS.
• O recoñecemento da cidadanía convirte ó Estado en impulsor da igualdade de dereitos e defensor da interculturalidade fronte ó Estado represor ante a inmigración. Impulsaremos a modificación e rebaixa das esixencias para adquiri-la nacionalidade do estado español. Potenciarémo-la celebración de referendos e votacións que, aínda que non sexan vinculantes, faciliten a integración na sociedade dos inmigrantes.
• RELACIÓN DE X.S.G. COAS O.N.G.s ADICADAS Á LOITA A FAVOR DA INTERCULTURALIDADE, O RESPETO E A SOLIDARIEDADE, ASÍ COMA CON COLECTIVOS DE INMIGRANTES.
• A colaboración coas O.N.G.s e asociacións é vital para o traballo nestes temas, xa que estas entidades contan con coñecementos amplos e reais da área á que se adican. Establecerase o diálogo con estas entidades. Faremos unha análise obxectiva das súas opinións e, se procede, impulsaremos a mutua colaboración.
• Prestaremos especial atención a colectivos étnicos, ás súas reivindicacións e sofrementos, contrastando as súas opinións con outras, obtendo unha visión obxectiva do problema.
• Formaremos unha mesa de traballo que se encargue da análise da situación das etnias e comunidades inmigrantes na nosa terra e propoña as liñas de actuación específicas neste eido.
• Participaremos en tódalas plataformas cidadás e apoiaremos tódalas propostas institucionais a favor da convivencia, a paz, o respeto, a interculturalidade, etc.
• POR SITUACIÓN ECONÓMICA
• A LOITA CONTRA A POBREZA E A EXCLUSIÓN SOCIAL.
• A pobreza (provocada polos camiños que levan as nosas economías e sociedades na orde mundial) ameaza á cohesión social e, o máis importante, á calidade de vida de moitas persoas.
• Ó falar de exclusión social, hai que falar de: baixos ingresos, desemprego, condicións infrahumanas de vivenda, pésimas condicións hixiénicas e sanitarias, baixos niveis de educación, oportunidades ou grado de integración na comunidade local, etc.
• Dende X.S.G. impulsaremos a análise desta situación e formularemos outros plantexamentos económicos e sociais, orientados cara estados máis xustos e igualitarios.
• Os xóvenes socialistas promoveremos que dende as institucións públicas se poñan en marcha políticas que favorezan a eliminación da exclusión social (acceso á vivenda, atención á drogadición e ás mulleres maltratadas, etc.).
• Constituiremos unha mesa de traballo a nivel nacional que estudie fórmulas para a erradicación e prevención da exclusión social. Recoméndase á nosa militancia a participación nalgunha organización de voluntariado como achegamento ás/ós máis desfavorecidas/os, así coma actividades propias no seo das agrupacións locais encamiñadas cara a disminución das diferencias sociais.
• POR IDEOLOXÍA POLÍTICA E/OU RELIXIOSA
• Situámonos en contra de toda manifestación que trate de conqueri-los seus obxectivos por medios violentos, xa que o fin non xustifica os medios.
• Actuaremos sempre en contra de calquera tipo de violencia sobre as persoas.
• Defendemos o Estado de Dereito como a forma máis xusta de organización política das coñecidas ata o momento, de cara á expresión e consecución duns ideais baseados no diálogo e no respeto.
• A loita violenta contra o sistema nútrese do deterioro social, do desemprego, da falta de motivación dos nosos mozos, da crise do Estado de Benestar, etc.
• Dende X.S.G. propoñemos:
• - Educación para o fomento dos valores democráticos, a traverso de campañas de participación cidadá, nos medios de comunicación, das propias actitudes persoais, nas familias, nas escolas, etc.
• - Busca de novos cauces de motivación xuvenil e formas de ocio.
• - Loita pola erradicación das circunstancias socio-económicas desfavorables que fomentan o descontento e a marxinación.
• - Solidariedade e colaboración con colectivos que sofren directamente as accións dos violentos.
• - Protección e apoio ás víctimas.
• - Denuncia de todo tipo de actitudes discriminatorias, xenófobas, intolerantes, antisemitas e racistas, ben sexa por institucións ou organismos, ben por asociacións de carácter fascista.
• POR ORIENTACIÓN SEXUAL
• HOMOSEXUALIDADE, LESBIANISMO E BISEXUALIDADE.
• LEI DE PARELLAS DE FEITO
• Acadar unha lei que supoña, tanto para gais e lesbianas, coma para a poboación heterosexual:
• - Dereito de sucesión.
• - Dereito a pensións.
• - Dereito a seguridade social da parella.
• - Dereitos e beneficios laborais segundo o estatuto dos traballadores.
• - Equiparación fiscal (posibilidade de declaración conxunta).
• - Nacionalización da parella extranxeira nas mesmas condicións que o matrimonio.
• - Dereito de adopción e/ou patria potestade copartida no caso de educa-los fillos dun membro da parella.
• - Indemnización no caso de morte por accidente de un dos membros da parella.
• - Consideración de "primeiro familiar" nas mesmas condicións que a/o cónxuxe.
• - Igualdade de oportunidades para todo tipo de acceso a beneficios e axudas públicas.
• Fomentaremos a concienciación popular da necesidade desta lei e presentaremos mocións a traverso dos grupos municipais socialistas para a creación de Rexistros de Parellas de Feito nos concellos galegos, ata que sexa aprobada dita lei.
• Loitaremos porque aparezan recollidos os mesmos dereitos que nesa Lei de Parellas de Feito na Lei Galega da Familia que a Xunta de Galicia ven de elaborar e de ser aprobada polo Parlamento autonómico.
• HOMOSEXUALIDADE E LESBIANISMO
• No ámbito da educación e igualdade, traballaremos por:
• - Unha educación sexual obrigatoria, obxectiva e científica, que forme individuos respetuosos, libres e responsables.
• - A supresión de calquera manifestación discriminatoria ou de patoloxía respecto á homosexualidade e ó lesbianismo nos textos académicos.
• - Información adecuada sobre este tema na formación das Forzas de Seguridade do Estado e dos funcionarios das prisións.
• No ámbito dos dereitos individuais e sociais, os nosos obxectivos son:
• - Impulsar campañas antidiscriminatorias, defendendo o dereito á diferencia e á libre orientación sexual das persoas.
• - Acadar un compromiso institucional sobre o trato deste tema nos medios de comunicación.
• - Traballar pola creación do Instituto Galego para a Igualdade Social, que se ocupe da promoción da igualdade e do dereito á diferencia. Traballaremos tamén con asociacións e colectivos que se adiquen a este tema.
• - Acudiremos a tódolos actos que sexan convocados na nosa terra polos colectivos e ás manifestacións do 28 de Xuño (Día do Orgulllo Gai-Lésbico) e, así mesmo, manteremos un diálogo moi fluído con tódalas asociacións e colectivos de Gays e Lesbianas existentes en Galicia, co fin de recolle-las súas inquedanzas e reivindicacións.
• No ámbito internacional traballaremos por:
• - Un compromiso vinculante de non discriminación por causas de orientación sexual no tratado de Maastrich.
• - Equiparación das parellas homosexuais ou lesbianas ó matrimonio nos ámbitos que son competencia da U.E.
• - Reforma das directrices que afectan ós dereitos e beneficios laborais, así coma á libre circulación das persoas.
• - Denuncia dos acordos da U.E. con países que penalizan a homosexualidade e o lesbianismo.
• - Recoñecemento da International Lesbian and Gay Association (I.L.G.A.) por parte da O.N.U.
• BISEXUALIDADE
• Este tema nunca foi traballado na nosa Organización, nin a nivel federal nin nacional, pero non pode ser desprezado, ó tratarse dun colectivo encuberto e fortemente discriminado.
• Para vence-los nosos estereotipos sobre esta cuestión (vicio, promiscuidade, inestabilidade, dexeneración, crise, etc.) precisamos documentarnos sobre o tema e o diálogo con persoas que se declaren bisexuais. Tanto heterosexuais coma homosexuais e lesbianas piden a definición cara un lado ou outro. Os bisexuais non entenden a súa sexualidade coma un periodo de transición, nen unha cuestión de xéneros.
• Serán accións a desenvolver neste eido:
• - O recoñecemento de que a visión que temos da bisexualidade é un condicionamento cultural.
• - Promoveremos unha educación sexual que non discrimine a este colectivo, e aceptaremos a liberdade de cadaquén para vivi-la súa sexualidade como quera.
• - A formación sobre este tema e a sensibilización cara á non discriminación deste colectivo.
• - A formación dunha mesa de traballo que se encargue de analizar e buscar solucións políticas ós problemas orixinados pola orientación sexual dos individuos.