EMPREGO

• INTRODUCCIÓN
• A situación social da nosa Comunidade Autónoma, un dos países menos favorecidos do Estado Español, semella ter empeorado, segundo o balance que sobre políticas de cohesión económica ven de realiza-la Unión Europea. Así, por exemplo, a nosa renda per cápita no ano 1993 era do 60% da media europea, cando dez anos antes, no ano 1983 era de un 61%.
• Neste contexto de estancamento e crise económica, os sectores máis desfavorecidos da poboación galega, entre os que se atopa a xuventude, sofren de xeito contundente a dureza das consecuencias da mesma: altas cifras de desemprego, precarización do mercado laboral, perda do poder adquisitivo, reducción dos sistemas de protección e cobertura social... Todo isto implica a necesidade dun debate profundo ó respecto.
• Xuventudes Socialistas de Galicia cre que, na loita por un futuro mellor para a xuventude galega (Formación e Emprego), debemos buscar un serio compromiso no que os poderes públicos xoguen un papel fundamental, ó igual que os axentes sociais.
• AS NOSAS PROPOSTAS
• Todo o dito anteriormente lévanos á plasmación das nosas propostas para as bases dunha NOVA política de Emprego Xuvenil, cunha atención específica á mellora da protección social, de especial importancia, para os colectivos menos favorecidos socialmente, e no ámbito da ideoloxía socialista baseada na equidade social.
• MEDIDAS DE CARÁCTER XERAL
• Articulación de políticas de desenvolvemento rexional que incentiven a xeneración de actividade e emprego.
• Revitalización dos principais sectores económicos da nosa Comunidade Autónoma:
• Transformación e modernización do sector agrícola coas seguintes medidas:
• Reconversión dos pastos, como consecuencia da caída da cota láctea, a traverso da reforestación.
• Incentivación da producción madereira, eliminando en todo o posible o eucalipto e repoboando con arborado autóctono.
• Estimulación do subsector da fruticultura, coa introducción de novas variedades ademais do Kiwi e o Mirabel.
• Estimulación do subsector da flor e da producción ornamental, apoiada por canles de distribución.
• Creación das condicións óptimas para posibilita-la comercialización dos productos hortofrutícolas e madeirables. Presencia nas feiras do sector.
• Posta en práctica de políticas de recuperación das rías, coas seguintes medidas:
• Articulación de medidas de protección medioambiental, a traverso de programas de limpeza e descontaminación das mesmas.
• Racionalización da producción, introducindo novas especies en función das características da zona xeográfica.
• Estimulación da creación de viveiros e piscifactorías, coa explotación de novos recursos no sector pesqueiro.
• Reforzamento do tecido industrial, mellorando as infraestructuras e a tecnoloxía, incentivando o acceso a novos mercados.
• Fomento e creación de novas P.EM.E.s.
• Balance equilibrado no desenvolvemento dos tres sectores -primario, secundario e terciario- da economía galega.
• Promove-lo debate na sociedade sobre a idoneidade do reparto do emprego.
• PROPOSTAS EN TORNO Ó EMPREGO XUVENIL
• Articulación de diferentes medidas tendentes á redistribución do mercado de traballo, facilitando a entrada dun maior número de xóvenes no mercado laboral.
• Elaboración dun sistema de Protección Social para aqueles e aquelas membros do colectivo xoven que, finalizado o período formativo, estean en situación de desemprego. Por ex.: dereito ó salario social, con prestacións sanitarias na Seguridade Social.
• Revisión completa das normas que regulan os diversos tipos de contratación, eliminando aquelas fórmulas que posibiliten as irregularidades e o fraude na contratación e que supoñan a precarización nas condicións laborais.
• Adecuación das modalidades de contratación en aprendizaxe e prácticas, para que sexan realmente instrumentos de preparación para o traballo. Por ex.: mellor organización da formación teórica, recoñecemento e certificación da formación e profesionalidade adquiridas polo aprendiz...
• Posta en funcionamento das Iniciativas Locais de Emprego, dando resposta ás necesidades de carácter social na comunidade local, explorando a creación de novos "xacementos" de emprego.
• Deseño de políticas de acceso do colectivo xoven galego ó sector agrícola, facilitando a incorporación das novas tecnoloxías á modernización e renovación da productividade.
• Participación dos xóvenes traballadores na planificación e articulación das políticas tecnolóxicas das empresas.
• Intensificación das accións encamiñadas a garanti-la igualdade entre os homes e as mulleres xóvenes traballadores, particularmente na remuneración salarial, acceso ó emprego, protección social, educación e formación profesional.
• O AUTOEMPREGO
• Canalización da xuventude galega desempregada cara novas fórmulas de creación de emprego.
• Fomento da Iniciativa Xoven Empresarial. Autoemprego a través das Sociedades Anónimas Laborais ou das cooperativas.
• Asociacións de xóvenes artesáns.
• Creación de equipos de apoio -económicos e técnicos- ó colectivo xoven nas iniciativas de autoemprego.
• Axilización da xestión e transformación dos fondos destinados polas diversas administracións e institucións para a promoción do autoemprego.
• Deseño de mecanismos de seguimento dos Proxectos de Autoemprego xa creados.
• Dende a Seguridade Social: exencións de cuotas ós autoempregados e autónomos no seu primeiro ano de actividade. Tamén das cuotas de teléfono, aluger, auga, etc., incluída a vivenda se é o lugar habitual de traballo.
• Creación de axudas ós autoempregadores para a contratación de persoal.
• Creación de viveiros empresariais: edificios de oficinas e locais de aluger baixo e subvencionado, nas áreas de desenvolvemento industrial, ademais de edificios de V.P.O., para o inicio da actividade profesional e empresarial.
• Regulamento da contratación mancomunada de persoal común, prorrateando as cargas sociais e fiscais oportunas.
• FORMACIÓN PARA O EMPREGO
• Racionalización da oferta formativa, potenciando aquelas ramas con rentabilidade social e relacionadas co entorno social.
• Actualización dos programas de estudios de F.P. e universidade para a inclusión nos seus contidos das novas perspectivas nos eidos científico, técnico e profesional.
• Introducción da Formación Sindical nos programas de estudios da F.P., como mecanismo de coñecemento e defensa dos dereitos laborais.
• lmplantación dun sistema único de certificacións e homologacións que validen a experiencia e formación profesional adquiridos en centros de formación reglada e non reglada.
• Recuperación de antigos oficios e técnicas artesanais entre os xóvenes, como fórmula de desenvolvemento local.
• FACENDA
• Xuventudes Socialistas de Galicia propón un troco no modelo de Facenda Pública: Propoñemos a eliminación das taxas sobor da creación dunha empresa. Apoiamos que a carga fiscal recaia sobor do beneficio, non sobor da inversión. Propoñemos atacar ás plusvalías, non ós custos de creación dunha empresa.
• XUVENTUDE, MEDIO RURAL E EMPREGO
• En liñas xerais, X.S.G. entende que é necesario un maior apoio por parte das administracións ós nosos agricultores e gandeiros, en aras da definición dun modelo de desenvolvemento sostible neses sectores que sexa tamén, evidentemente, competitivo fronte ós nosos socios europeos.
• CONCLUSIÓNS
• Xuventudes Socialistas de Galicia entende o emprego como un instrumento de desenvolvemento e cohesión social, non tolerando a utilización dos mozos/as como meras pezas da cadea de producción capitalista. Polo tanto, avogamos pola participación das e dos traballadores/as na xestión das empresas mediante a negociación colectiva, o cooperativismo, as sociedades anónimas laborais, etc...; sendo o noso mellor compromiso coa xuventude galega a loita polo emprego estable.