COOPERACIÓN E SOLIDARIEDADE

• AS RELACIÓNS NORTE/SUR
• O problema máis preocupante na actualidade no referente á solidariedade internacional é a eterna división entre o Norte e o Sur do planeta, provocada por un sistema económico mundial que produce grandes desigualdades, baseado nun réxime de relacións comerciais que explota ó Sur.
• A interdependencia entre o Norte e o Sur non pode basearse, coma ata o de agora, nun claro dominio económico e comercial do primeiro sobre o segundo, nin na imposición cultural dos países desenvolvidos, nin na imposición de modelos de crecemento agresivos co medio ambiente.
• Para axudar ós países do sur debemos axudar á construcción de estados cunha certa estabilidade política sen bloquea-las raíces culturais autóctonas.
• A cooperación no desenvolvemento dos pobos non debe medirse soamente en termos materiais e económicos. Debemos tentar -sempre que a poboación maioritariamente así o desexe- que se implanten os valores democráticos.
• O esforzo neste tema é unha cuestión de xustiza social, e debe encamiñarse a soluciona-la subordinación en materia económica e social que padecen respecto ós países desenvolvidos.
• Defendemos unha política común de desenvolvemento sostible, en sustitución das actuais estructura e mecanismos de subordinación. Consideramos como principal factor de axuda a educación, como base para a prevención de conflictos bélicos e dunha axuda ó desenrolo da economía; é dicir, axudar ós países do terceiro mundo para que poidan traballar cos seus recursos naturais, para que acaden a súa propia producción e para que os beneficios désta recaian no seu propio beneficio, non no dos países desenvolvidos.
• X.S.G. denuncia a venda e o tráfico de armas dos países desenvolvidos ós países subdesenvolvidos.
• ACCIÓN E TRABALLO COAS O.N.G.s
• Establecerase o traballo con O.N.G.s progresistas que teñan un ideal político que non sexa contrario ó do noso partido e que traballen nos ámbitos da cooperación e solidariedade cos sectores máis desfavorecidos da nosa sociedade e con todos aqueles estados: non desenvolvidos, en conflicto, ou que sufran algún tipo de catástrofe e deban ser apoiados con axuda humanitaria (sanitaria, alimentaria, de acobexamento...).
• A importancia deste traballo baséase na eclosión de organizacións e asociacións que traballan nunha gran diversidade de temas e que conectan moi ben coa xuventude.
• É o noso deber penetrar en todo o tecido social, e o movemento das O.N.G.s ofrece un achegamento ás inquedanzas da nosa sociedade.
• Defendemos o diálogo permanente entre as organizacións de voluntariado, os movementos sociais e as administracións públicas. Debemos ter claro que o voluntariado non debe sustituír ou suplir ós servicios públicos, xa que estaría debilitando as conquistas conqueridas.
• No eido do voluntariado propoñemos:
• - Que a administración cumpra un doble compromiso respecto ó voluntariado: promocionar e informar a (e, á vez, permañecer a disposición de), as O.N.G.s, ofertando medios e recursos para que éstas realicen as súas actividades.
• - A creación dun foro permanente de interlocución e diálogo entre as administracións públicas, as O.N.G.s e os axentes socio-económicos, para articula-las respostas ós problemas e ás iniciativas das O.N.G.s.
• - A sustitución das subvencións a proxectos de importancia pública por convenios-programa, para establecer deste xeito as obrigas recíprocas entre estas asociacións e a administración, e, sobre todo, para introducir un principio esencial: a avaliación dos programas nos que se gastan cartos públicos.
• Será traballo de X.S.G. nos vindeiros anos:
• - O impulso de campañas que dean a coñoce-lo traballo das O.N.G.s ó conxunto da xuventude galega e as formas en que poder traballar nas mesmas.
• - Impulsar todo tipo de actos e mobilizacións a favor de que se adique o 0´7% do P.I.B. do Presuposto da Comunidade Galega e do Presuposto de cada concello a proxectos de cooperación co Terceiro Mundo.
• - Tratar de realizar exposicións de fotografías facilitadas por diferentes O.N.G.s para, deste xeito, explicar e denuncia-las situacións de penuria de diversas poboacións concretas.
• - Prestar unha especial atención en denuncia-las situacións en que viven as poboacións de Timor Leste, Sáhara e Cuba, tratando de impulsar axuda encamiñada a estas poboacións.
• - Colaborar con aquelas O.N.G.s adicadas á educación para o desenvolvemento e para a paz, co fin de realizar campañas conxuntas deste tipo.
• - Sensibilizar ós nosos cargos públicos, para que teñan máis en conta o traballo das O.N.G.s.